Gielda- ja guovlodepartemeanta bivdá cealkámušaid jahkásaš stuoradiggedieđáhussii sámi giela, kultuvrra ja servodateallima birra.
Ráđđehus ráhkada jahkásaččat stuoradiggedieđáhusa sámi giela, kultuvrra ja servodateallima birra, iešguđetlágan fáttáiguin juohke jagi. Ráđđehus lea mearridan ahte 2025 fáddá lea ráddjejuvvon dasa ahte gieđahallat suohkaniid ja fylkkasuohkaniid ovddasvástádusa addit buriid ja dásseárvosaš bálvalusaid sámi álbmogii.
Dieđáhusas galget dearvvašvuođa- ja fuolahusbálvalusat vuoras sápmelaččaide, mánáidsuodjalus ja heahteguovddášfálaldagat loktejuvvot ovdan, lassin eará sosiála- ja čálgofálaldagaide maid earret eará bargo- ja čálgohálddašeapmi (NAV) lágida.
Ráđđehus čilge ahte dieđáhusas gieđahallojit fálaldagat mat veahkehit nannet mánáid ja nuoraid sámi giela ja identitehta. Lea maid áigeguovdil guorahallat muhtun fáttáid mat váldojuvvojedje ovdan guovtti maŋemus jahkásaš stuoradiggedieđáhusas, gelbbolašvuođa ja rekruterema birra mánáidgárddiin, vuođđooahpahusas ja alit oahpus ja álbmotdearvvašvuođa birra sámi álbmogis.
– Dieđáhusa barggus boahtit mii gulahallat guoskevaš departemeanttaiguin ja Sámedikkiin. Mii gulahallat maid KS:in. Mii háliidit áinnas rávvagiid áigeguovdilis doaibmabijuide buoridan dihtii gielddaid ja fylkkagielddaid bálvalusfálaldagaid sámi ássiide.
Sii bivdet sáddet cealkámušaid ovdal skábmamánu 8. beaivvi 2024 skoviin mii lea sin siiddus.
