Stáhtaministtar muitalii ikte Álttá joatkkaskuvllas ahte jávkan lea njiedjan maŋŋel go leat bidjan ođđa jávkanmearrádusa doibmii.
Stáhtaministtar muitalii ikte Álttá joatkkaskuvllas ahte jávkan lea njiedjan maŋŋel go leat bidjan ođđa jávkanmearrádusa doibmii.
Finnmárkku joatkkaskuvllain lea jávkan njiedjan 47 proseanttain, čájehit juovlamánu 1. beaivvi logut, maŋŋel go ráđđehus bijai ođđa jávkanmearrádusa doibmii.
– Dá lea signála mii čájeha ahte gánnáha čađahit ortnega ja disipliinna klássalanjain, muitala Solberg NTB:i.
Alla jávkan leamaš Finnmárkkus
Su mielas ii leat fávdnát movt ruksesruoná ráđđehus divttii jávkama leat gosii eaktodáhtolažžan joatkkaskuvllas. Solberg muitala ahte varas iskkadeapmi lea duođaštus ahte lei riekta bidjat jávkanmeari mii lea 10 proseantta.
– Mii diehtit ahte jávkan lea erenoamáš allat leamaš Finnmárkkus, dadjá Erna Solberg.
Oahpu haga oažžut barggu
Nordisk Institutt dutki Elfred Magnussen muitala NRK:i ahte Finnmárkkus ii dárbbašuvvo oahppu go ohcá barggu. Stáhtaministtar Solberg lohká dat lea liiggástallan dadjat juste nie.
– Mun jáhkán finnmárkulaččat maid oidnet ahte lea juhkkojuvvon ášši sohkabeliid gaskkas Finnmárkkus. Nieiddat čađahit skuvlavázzima, ja bártnit ges heitet. Mun in daja ahte lea veadjemeahttun oažžut barggu oahpu haga Norggas, muhto ii leat buorre dahkat dan, muitala stáhtaministtar NTB:i. (©NTB)
