Dássážii leat 36 olbmo duššan johtolagas Norggas. Logis dušše miessemánus. Seamma áigodagas diibmá, dušše 47 olbmo.
Dássážii leat 36 olbmo duššan johtolagas Norggas. Logis dušše miessemánus. Seamma áigodagas diibmá, dušše 47 olbmo.
Dan logásis geat dušše johtolagas mannan mánu, ledje vihtta biilavuoddji, njeallje mohtorsihkkelvuoddji ja okta vázzi olmmoš.
– Dat mii lea buorre lea go jápminlohku njiedjá. Muhto našunála mihtut leat vel áŋgireabbot. Leat ain beare máŋggas geat duššet dahje bahuid roasmmehuvvet. Min bargu ferte intensiverejuvvot ja lea čájehuvvon ahte politiijaid bearráigeahčču lea buoremus reaidu lihkohisvuođaid eastadeamis, lohká Trygg Trafikk direktevra Jan Johansen.
– Geaidnopolitiijat čorgejit
Trygg Trafikk oaivvilda ahte Geaidnopolitiijat leat dat deháleamos oassi manne jápminlogut leat njiedjan, ja moitet Frøstrup-lávdegotti mii lea evttohan heaittihit Geaidnopolitiijaid.
– Ii leat eahpádus ahte Geaidnopolitiijat čorgejit daid váráleamos johtaleddjiid eret luottain, lohká Johansen.
Logut lassánit
Geaidnopolitiijat leat maŋemuš guokte jagi váldán eambbo ja eambbo olbmuid johtalusrihkkuma dihte. 2015 válde 104 609 olbmo, diibmá fas 113 043 olbmo. Go cuoŋománnu nogai dán jagi, ledje Geaidnopolitiijat váldán 39 416 olbmo. Diibmá seamma áiggi lei dat lohku 36 730.
– Evttohus heaittihit Geaidnopolitiijaid manná dokumenterejuvvon johtalussihkarvuođa vuostá. Dárkkisteamit leat dat buoremus doaimmat lihkohisvuođaid eastadeamis. Mii dárbbašit eambbo dárkkistemiid, ii fal unnit, lohká Johansen.
(©NTB)
