-Almmuhus-
-Almmuhus-
-Almmuhus-
OĐĐASATJápminlihkohisvuođat lassánan johtolagas – Davvi-Norggas njiedjan

Jápminlihkohisvuođat lassánan johtolagas – Davvi-Norggas njiedjan

-

-

Dán rádjái leat 38 olbmo duššan johtolatlihkohisvuođain Norggas dán jagi. Dat lea measta 30 proseantta eanet go diibmá. Trygg Trafikk váruha lihkohisvuođaid lassánit giđđat ja geasset.

Diibmá njidje lihkohisvuođat johtolagas, eaige leat ovdal leamašan nu vuollin logut go 1947:s. Dán jagi leat logut lassánan.

– Mii leat vuorjašuvvan lassáneami dihte. Juohke logu duohken statistihkas lea tragediija. Leat ollu bearrašat, olbmát ja servvodagat mat báhcet morrašii johtolatlihkohisvuođaid maŋŋel, dadjá Trygg Trafikk direktevra Jan Johansen.

 

Stuorimus várra

Johansen ballá ahte jápminlogut lassánit dán giđa ja geasi. Geassemánuin dáhpáhuvvet eanemus lihkohisvuođat johtolagas. Leat ollu biillat jođus vahkkoloahpaid ja bassebeivviid.

– Dasa lassin leat ollugat geat sihkkelastet, vudjet mopedain ja mohtorsihkkeliin. Sis lea stuorát várra roasmmohuvvat go biilavuddjiin. Stuorimus várra lea mohtorsihkkelvuddjiin, muitala Johansen.

 

Cuoŋománu logut

Gávcci olbmo dušše johtolagas Norggas cuoŋománus. Buohkat geat dušše ledje dievdoolbmot. Guovttis leigga biilamátkkošteaddjit, golmmas ledje mohtorsihkkeliin, okta lei ATV-vuoddji, okta lei sihkkelasti ja okta lei vázzime.

Gaskamearálaččat maŋemus viđa jagis leat ovccis duššan johtolagas Norggas cuoŋománus.

 

Davvi-Norggas njiedjan jápminlihkohisvuođat

Cuoŋománnu lei buorre mánnu Davvi-Norgga johtolagas. Vuosttaš logut čájehit ahte ii okta ge duššan johtolagas mannan mánu.

Dán jagi logut čájehit ahte leat njeallje olbmo duššan johtolagas dán rádjái. Dat lea okta unnit go diibmá. Maŋemus viđa jagis leat gaskamearálaččat duššan birrasii čieža ja gávcci olbmo vuosttaš njealji mánus. Cuoŋománnu lea dat mánnu go leat unnimus jápminlihkohisvuođat johtolagas.

-Almmuhus-