Jane Astrid Juuso oaččui Sámedikki giellabálkkašumi mii geigejuvvui Sámedikki dievasčoahkkimis gaskavahkku.
Sámediggi juohká juohke njealját jagi giellamovttiidahttinbálkkašumi, ja dan sáhttá addit ovttaskas olbmui dahje fitnodahkii, prošektii dahje organisašuvdnii, mii lea garrasit bargan sámegiela nannemiin, ovddidemiin ja seailluhemiin.
Sámediggeráđđi geige giellamovttiidahttinbálkkašumi Jane Astrid Juusoi go lea bargan giellaealáskahttimiin ja váldán giela ruovttoluotta.
– Munnje lea stuora gudni geiget giellamovttiidahttinbálkkašumi Jane Astrid Juusoi ja giittán dan maid leat bargan sámegiela ovdánahttima ektui. Don ánssašat bálkkašumi go movttiidahtát nuoraid ja vuorrasiid gielain, logai sámediggepresideanta Vibeke Larsen sárdnestuolus.
Bálkkašupmi lea 50 000 ruvnnu ja dáiddadiploma.
Sámi giellaráđđi ásahii giellamovttiidahttinbálkkašumi 2000:s, ja bálkkašupmi juhkkojuvvui vuosttaš geardde Sámedikki dievasčoahkkima oktavuođas 2000 skábmamánus.
