Ivgus firre guokte uđđasa gaskavahkku. Čieža olbmo gárte muohttaga vuollái. Golmmas leat roasmmehuvvan ja okta jámii lihkohisvuođas.
Ikte, njukčamánu 30. beaivvi, firre guokte uđđasa Ivgu suohkanis.
Nedretindenis, Vuošvákkis gárttaiga guovttis muohttaga vuollái. Okta olmmoš dolvojuvvui Davvi-Norgga universitehtabuohccevissui Romsii. Nubbi gal beasai ieš eret uđasbáikkis, ii ge son leat roasmmehuvvan.
Steinfjellas ges gárte vihtta olbmo muohtauđđasii. Okta beasai dearvan, golmmas leat roasmmehuvvan ja okta jámii.
Buohkat geat bártidedje lihkohisvuođas leat olgoriikkalaččat, dieđihit politiijat preassadieđáhusas.
Rukses ruossa, Norgga álbmotveahkki, Suodjalusa helikopter, Norgga gádjunbeatnagat, Norsk Radio Relæ Liga, Váldogádjunguovddáš ja Bánat gádjunhelikopter serve politiijaiguin gádjunbargui.
