Dat guokte gumppe maid Stáhta Luonddubearráigeahčču ikte sirddii Deisjøen-guovllus Østerdalenis, luitojuvvojedje guvlui mii lea lulábealde E18 geainnu ja oarjjabealde Glomma.
Deisjøen-guovllu gumpepárra váldojuvvui ođđajagemánu 3. beaivvi gitta. Stáhta Luonddubearráigeahčču (SNO) jámihii ja rádiomerkii gumppiid. Maŋŋit sotnabeaieahkeda luite fas gumppiid.
Maŋŋel, go ledje luoitán gumpepára, de bearráigeahčai SNO daid moadde diimmu guovllus, ja sin dieđu mielde orru sirdin ja luoitin mannan bures, čállá Birasdirektoráhtta preassadieđáhusas.
Gáibádusat guvlui
Dálkkádat- ja birasdepartemeanta dat lea gohččon gumpepára sirdit, dan barggu lea Birasdirektoráhtta ožžon ja direktoráhtta leage maid de mearridan gosa gumppiid galgá sirdit. Guovlu lea Sarpsborg ja Våler gielddain.
– Obbalaš árvvoštallama vuođul leat gávnnahan dan guovllu buoremussan. Dat lea viidámus guovlu, gos eai leat olu eará gumppet mat atnet guovllu iežaset guovlun, čájeha 2019/2020 dálvvi nálleraporta. Doppe leat viiddis vuovdeguovllut ja lea guhkki dan guvlui gos leat viežžan gumppiid eret, dadjá Birasdirektoráhta sekšuvdnajođiheaddji Knut Morten Vangen.
Galget ráfis bállet
Birasdirektoráhtta lea earret eará dáid gáibádusaid bidjan vuođđun:
Báikkis galget vuovddit vai gumppet bállejit ráfis maŋŋel luoitima, doppe eai galgga eará dihto gumppet mat atnet báikki iežaset guovlun, ii galgga lahka gumppehálddašanguovlluid olggumus rájáid ja galgá guhkkin eret Deisjøen-guovllus vai hehtte gumppepára máhccamis fas dohko.
– Lea dehálaš ahte gumppet bállejit ráfis maŋŋel sirdima. Dakkár stuorra návddiid sirdin lea váttis ja dasa leat čadnon riskkat. Danne eat leat ovdal háliidan dieđihit dan birra, eat ge dáhto dál ge muitalit justa gosa gumppet leat luitojuvvon. Gielddat ja eananeaiggát ožžo dieđu sotnabeaieahkeda, čilge Vangen.
Birasdirektoráhtta sáhttá čuovvut gumppiid GPS-čeabetbátti bokte, ja áigot maŋit áiggis almmuhit dieđuid dan hárrái.
