Vuossárgga eahkeda lei muhtin ruskalihtti buollán olggobealde Kárášjoga mánáidskuvlla. Oahpaheaddji, guhte lei okta dain geat fuomášedje buollima, ávžžuha váhnemiid hállat mánáideasetguin.
Vuossárgga eahkeda lei muhtin ruskalihtti buollán olggobealde Kárášjoga mánáidskuvlla. Oahpaheaddji, guhte lei okta dain geat fuomášedje buollima, ávžžuha váhnemiid hállat mánáideasetguin.
Vuossárgga birrasii gávccis eahkedis ožžo oainnat buollinčáskadeaddjit dieđu ahte lei buollin Kárášjoga mánáidskuvlla olggobealde.
Filmmažis, man Ellen Inga Hætta lea filbmen, oainnát buollinčáskadeddjiid čáskadeamen buollima.
Hakse rakeahttahája
Laila Sara Hegge, guhte ieš bargá oahpaheaddjin mánáidskuvllas, lei okta dain guđet fuomášedje buollima.
Son muitala skuvllas leamaš sihke váhnemiid ja oahpaheddjiid skuvlla-ruovttu ovttasbarggu oktavuođas, go fuomášedje buollima.
– Mii leimmet máŋgii haksán dakkár rakeahttahája, sihke skuvlla siste ja olggobealde. Mii finaimet máŋgii geahččamin gos hádja boahtá, muhto eat gávdnan maidege. Muhto go de gearggaimet ja vácciimet nurkki birra, de fuomášeimmet ahte okta ruskalihtti suovasta, muitala son.
Son muitala ahte de bođii dasa okta gánda guhte rohttestii dan ruskalihti eret seainni luhtte, ovdal go jávkkihii fas.
– Moai ovttain váhnemiin de rohttesteimme lihti veahá vel dobbeliidda ja riŋgiime buollinčáskadeddjiide, čilge son.
(Ášši joatká gova vuolábealde)
Govven: Inga Marie Guttorm
Jáhkká kinapuhtaid bullehan ruskalihti
Oahpaheaddji muitala de iežas fuomášan dakkár páhkaža mas čuožžu «Halloween spinner», dat leat dakkár kinapuhtta-duhkkorasat maid vuvdet eanaš borramušgávppiin dáid muttuid.
– Mii gal leat áibbas sihkkarat ahte diet «Halloween spinnerat» dat bullehedje ruskalihti. Lei issoras, dies lei sáhttit buollát albma ládje jus olbmot eai lean fuomášit. Das ledje eambbo ruskalihtit lahka ja biillat maid, lohká son.
Son ávžžuha váhnemiid atnit mánáideaset čalmmis.
– Váhnemat berrejit čuovvut mielde maiguin mánát stohket ja maiddái hállat singuin dan birra ahte lea váralaš jus buollá ja mii sáhttá geavvat, lohká son ja muitala iežaset odne skuvllas hállan dán birra ohppiiguin.
(Ášši joatká gova vuolábealde)
Govven: Laila Sara Hegge.
Eai dieđe geat leat bullehan lihti
Kárášjoga buollinčáskadanossodaga jođiheaddji Nils Asllat Kildedam duođašta iežaset šaddan fitnat skuvlla luhtte čáskadeamen buolli ruskalihti.
– Eai galggaše olbmot aitto ruskalihtiid gal cahkkehit, jus lihtti livččii leamaš seainni lahka, de lei sáhttit dagahit stuorra vahága, skuvla lei árvideames buori muddui billašuvvat, lohká son.
Son ii loga iežas ožžon buot dieđuid das mii galgá leat dáhpáhuvvan, ii ge loga iežaset diehtit mo ruskalihtti lea buollán dahje gii dan lea cahkkehan.
– Sáhttet leat mánát cahkkehan dan, lohká son.
Čáskadedje jođánit
Buollinčáskadeaddjit fitne báikkis ja jođánit čáskadedje buollima.
Dan oktavuođas lea Kildedamas maid ávžžuhus olbmuide:
– Ávžžuhan ahte váhnemat hállet mánáideasetguin ahte diekkár daguid eai galggaše gal dahkat. Lea stuorra vahát servodahkii jus skuvla mat buolášii gutnan, lohká son ja deattuha ahte ii dieđe leat go mánát bullehan lihti.
Govven: Berit Marie Lise Eira
