Beowulf nammasaš fitnodaga doaimmajođiheaddji jáhkká ahte Ruoŧa ráđđehus addá lobi ruvkedoaimma álggaheapmái Gállokis.
Beowulf nammasaš fitnodaga doaimmajođiheaddji jáhkká ahte Ruoŧa ráđđehus addá lobi ruvkedoaimma álggaheapmái Gállokis.
Yle Sápmi ja P4 Norrbotten dieđihit ahte áramustá guovvamánus lea vuordimis ahte Ruoŧa ráđđehus mearrida oažžu go Eŋglándda Beowulf fitnodat doaibmalobi ruovdemálbmaruvkii Gállokis Johkamohki oarjjabealde.
Beowulf fitnodaga doaibmajođiheaddji Kurt Budge mielde fitnodagas ii leat váttisvuohta gávdnat investerejeddjiid Gállokii, vaikko máŋgasat vurdet Ruoŧa ráđđehusa mearrádusa ruvkedoaibmalobiid ektui ovdal go bidjet dasa lasi ruđa.
Budge jáhkká ahte Ruoŧa ráđđehus miehtá ruvkefidnui.
– Mu mielas mis lea ágga jáhkkit ahte mii leat vuđolaččat dokumenteren dán leat vejolažžan, ja maŋimuš jahkebealis leanaráđđehus ja ruvkedárkkistanvirgedoaimmahat Bergsstaten leat miehtan ruvkedoaibmalohpái. Nu mun jáhkán dáinna geainnuin mii ovdánit, lohká Budge.
Mannan čavčča ges buvttii vuosttaš háve Bergsstaten oaiviliid Johkamohki ruvkedoaimmaide.
Geassit 2013 olusat čájehedje vuostehágu Beowulf ruvkeplánaide Gállokis.
