Vaikke Hardangerduoddara goddelohku lea geahpeduvvon de gottit ain leat rávžasat. Dál leat šibitdoaktárat iskamin sáhttet go gurpmát sivvan dása.
Vaikke Hardangerduoddara goddelohku lea geahpeduvvon de gottit ain leat rávžasat. Dál leat šibitdoaktárat iskamin sáhttet go gurpmát sivvan dása.
– Maŋimuš jagiid leat leamaš heajos njuovvandeattut Hardangerduoddara gottiin. Nu lea goddelohku geahpeduvvon, dat dattege ii oro ábuhan go gottit leat ain rávžas, čilge Norgga Šibitdoavttir Instituhta šibitdoavttir Kjell Handeland.
Guohtumat vuoiŋŋastan
Handeland muitala šibitdoaktáriid dál geahččaleamen duođaštit ahte gurpmát ja sávlagat dat dagahit gottiid rávžžasin. Bohccot lávejit geaseáigge bálgat allaeatnamiidda ja jasaide, gurbmáloddi dahje boaru oainnat ii girdde doppe. Jus bohccot olu šaddet báhtarit dáid divrriin de dat váikkuha guohtumii ja nu sáhttet rávžat.
– Dál gal galget dálveguohtumat beassan vuoiŋŋastit go goddelohku lea njiedjan, muhto liikká eai leat deattut olus buorránan. Seammás leat goddeealut guohtugoahtán Hardangerduoddara lulágeaži, ovdal ledje oarjelis ja dál leat eanet gottiiguin gurpmát ja sávlagat go ovdal, čilge Handeland ja muitala iežaset jáhkkit dán guovllus leat eanet gurbmálottiid.
– Gurbmá ii leat ođas
– Gurpmát ja sávlagat eai leat ođđa áššit, dáid dovdet maiddái sámi boazodoallit. Muhto dál lea olu gottiin čájehuvvon leat dát parasihtta, čilge Handeland.
Šibitdoavttir ii loga iežaset sáhttit maidege dahkat dáinna go lea goddeealuid birra sáhka. Sámis lávejit ivomec-dálkasiin boahkuhit bohccuid eastadan dihte gurbmáepidemiijaid.
Dál leat dutkit ožžon báhčinlobi ja nu áigot ge báhččit 10-15 goddečearpmaha vai besset dutkat gurpmáid.
– Ii leat nu buorre giđđat gal báhčit gottiid, muhto mii fertet dál dahkat dan. Jus vuordit bivdoáigodahkii, čakčii, de eat nagot šat oaidnit gurpmáid nu bures, muitala Handeland.
