Jáhkket Elin Kåvena vuoitit

Riikkaidgaskasaš veahtinfitnodat Unibet lea maŋŋálastán artisttaid geat galget gilvalit Norgga Melodi Grand Prix finálas boahtte vahkkoloahpa.

Oiddot vuoitit lea Sámi artista Elin Kåven, lávlagiin «First Step in Faith».

– Oassalástit leat hui dássálaga, ja mii oaidnit njealje – vihtta vejolaš vuoiti. Muhto mii oaidnit «Elin and the Woods» guhte ánssáša leat oiddohin ovdal live-sáddagiid, ovddabealde Ammunition ja Kristian Valena, lohká Unibeta Kjell Hanssen.

Sámi árbevirolaš luohti

Lávlagis, man Elin galgá lávlut Melodi Grand Prixas, lea áibbas eará stiila go das man dábálaččat čuojaha.

Dál son galgá čuojahit elektrovnnalaš musihka.

Lávlagis gullo maiddái sámi árbevirolaš luohti, mas ieš juoigá ja lávlu sámegillii.

Lávlla buktá oktii kristtalaš dábiid ja sámi dábiid, kultuvrra ektui.

– Mu mielas lea hui gelddolaš oaidnit makkárin dat šaddá, go doppe lea sihke gospel- ja juoigankoarra, dajai Elin Kåven Ávvirii mannan vahkus.

«Fánssaid» sadji dievvan

Elin Kåven sávvá maid ahte ollu gávttehasat bohtet Melodi Grand Prixii geahččat sin.

Ja nu go buot artisttain lea, de leat buohkain «fánssaid» sadji gos iežaset «fánssat» leat.

Elina «fánssaid» sadji gal lea juo dievvan, nu ahte bohtet ollu geahččit geahččat Elin Kåvena ja su joavkku.

– Mun lean nu gealdagasas dál, dajai Elin Kåven loahpas.

Unibet einnosteapmi:

(1) Elin & The Woods: Vuoitu oddsa: 2,50

(2) Ammunition: Vuoitu oddsa: 3,50

(3) Kristian Valen: Vuoitu oddsa: 4,50

(4) Ella: Vuoitu oddsa: 7,50

(5) Ulrikke: Vuoitu oddsa: 12,5

(6) In Fusion: Vuoitu oddsa: 15,0

(7) Amine Sewali: Vuoitu oddsa: 20,0

(8) JOWST: Vuoitu oddsa: 25,0

(9) Jenny Augusta: Vuoitu oddsa: 35,0

(10) Rune Rudberg Band: Vuoitu oddsa: 40,0

Maiddái Betsson ja Paf veahtinfitnodagat einnostit Elin Kåvena vuoitit, ja leat bidjan vuoitinoddsa sutnje 2,60 ja 2,50.