Njeallje olbmo juohke logi olbmos jáhkket ahte boahtte jahkái leat viessohattit lassánan. – Vuordit ahte viessohattit eai lassán nu olu go ovddit jagiid leat dahkan, lohká opmodatvuovdi.
Njeallje olbmo juohke logi olbmos jáhkket ahte boahtte jahkái leat viessohattit lassánan. – Vuordit ahte viessohattit eai lassán nu olu go ovddit jagiid leat dahkan, lohká opmodatvuovdi.
Njealjis juohke logi olbmos jáhkket ahte viessohattit lassánit boahtte jagi. Dat lea sullii seamma dásis go geassemánus, muhto olu unnit go njukčamánus. Dalle čájehedje BoligMeteret iskkadeamit ahte 67 proseantta jáhkke ahte viessohattit bohte loktanit boahttevaš jagi.
– Dát čájeha maid ahte haddegoargŋun lea leamaš unnit Davvi-Norggas go ovdal. Mii vuordit ahte haddegoargŋun ii boađe nu olu lassánit, muhto lea maid dehálaš deattuhit ahte ii leat várra ahte viessohattit fáhkka gahččet, lohká Kristin Amundsen EiendomsMegler1 preassadieđáhusas.
Son lea administratiiva direktevra EiendomsMegler 1 Davvi-Norggas.
Ođđa viessoloanain lea ávki
Vuollegis reanttut leat dagahan ahte gánnáha loana váldit, mii fas dagahii ahte viessohattit gorgŋo. Danne leat eiseválddit mearridan ođđa viessoloatna-láhkačállosa. Dat bohtet fápmui jahkemolsašumis.
– Vaikke eai leat eambbo viesut vuovdemassi davvin, de lea haddeovdáneapmi láivvit. Danne oaivvildit ahte eiseválddiid ođđa njuolggadusat leat olahan dan maid galge, unnidit haddegoargŋuma, lohká Amundsen.
Seammás deattuha ahte eai leat makkár ge mearkkat ahte viessohattit bohtet njiedjat Davvi-Norggas. Norggas ii leat ekonomalaš šaddu leamaš ná buorre guhkit áigái, ja iskan čájeha optimismma Norgga ekonomiijai. Seamma mađe viesut leat leamaš vuovdemassi daid maŋemuš golbma jagi.
– Dát čájeha ahte viessomárkan doaibmá, ja adde midjiide maid dan doaivaga ahte ovdána buori guvlui. Borgemánu lei unnán ovdáneapmi, ja jáhkán dat boahtá nu gohčoduvvon Oslo-beavttus, lohká Amundsen.
Oslo-beaktu
Oslos leat viessohattit gahččan guovtti siva dihte. Doppe leat 1 344 eambbo viesu vuovdemassi go seamma áiggis ledje diibmá. De gahčča haddi.
Nubbi lea ahte oaivegávpogis leat sierra njuolggadusat viessoloanaide, mii dagaha ahte ii leat lihka gánnáhahtti váldit loana nuppi vissui.
– Dát ii leat Davvi-Norggas, ja danne dáppe ii leat seamma dilli. Mis lea leamaš buorre goazasteapmi haddeovdáneamis, ja vuordit ahte viessohattit eai ge lassán nu olu go ovddit jagiid leat dahkan, lohká son.
