Stáhtaministara lohpádus ahte eai galgga ádjánit vel 500 beaivvi ovdal čovdet Fovse-ášši ja heaittihit olmmošvuoigatvuođarihkkumiid, ii dáidde ollašuvvat, jáhkká Sosialisttalaš Gurutbellodat (SG).
SG stuoradiggeáirras Lars Haltbrekken čuoččuha ahte Norgga stáhtaministtar Jonas Gahr Støre rihkku dan lohpádusa maid attii Fovse-miellačájeheddjiide geat dálvet čađahedje akšuvnnaid ráđđehusviesuin ja muđui Oslos.
Dalle lei gollan 500 beaivvi dan rájes go Alimusriekti dubmii ahte Fovse-bieggafápmoguovlu rihkku sámiid vuoigatvuođaid ja olmmošvuoigatvuođaid.
– Dat ii dáhpáhuva, Ella. Dat ii dáhpáhuva. Nu siterii Haltbrekken stáhtaministara Stuoradikki gažadanbottus gaskavahku.
Haltbrekkena dieđuid mielde lea nie daddjon go stáhtaministtar válddii oktavuođa Ella Marie Hætta Isakseniin. Sámi akšunisttain lei čoahkkin stáhtaministariin Trefoldsighetskirkenis Oslos Fovse-ášši birra, gos Ella Marie moittii go ráđđehus juo lei geavahan 500 beaivvi áššái.
– Mii ballat ahte gollet vel unnimusat 500 beaivvi ovdal go heaittihit olmmošvuoigatvuođarihkkumiid Fovsses. Orrot duššilohpádusat ahte ii mana nuppe dan mađe áigi ovdal čovdet ášši, dadjá Haltbrekken NTB ođasdoaimmahahkii.
(©NTB)
