-Almmuhus-
-Almmuhus-
-Almmuhus-
VALÁŠTALLAN– Jáhkán šaddat buoret vuoddjin dál

– Jáhkán šaddat buoret vuoddjin dál

-

-

Čáhcecross vuoddjái Joachim Olsenii, lei illusáhka go Kárášjoga gielda ikte mearridii addit lobi jávrris hárjehallat čáhcecrossa.

Otná rájes de besset Kárášjoga Mohtorsearvvi čáhceskuter vuoddjit álgit hárjehallat ruovttubáikkis. Kárášjoga Gielda lea dal addán lobi hárjehallat Dievvaljávrris Kárášjoga.

– Dal lea mus jurdda hárjehallat dassá jiekŋa boahtá, ja mun illudan dasa ollu. Mus lea buorre jáhkku šaddat vel buoret vuoddjit čáhcecrossa go dál lean, go beassat hárjehallat dáppe ruovttus ja jávri ii leat guhkkin eret, muitala Joachim Olsen guhte mannan vahkkoloahpa vuittii Open Watercross luohkás čáhcecrossas Guovdageainnus.

 

– Leamaš dárbu

Eai leat nu oallugat geat vuddjet Kárášjogas čáhceskuteriin, muhto skutervuoddjit oidnet stuora dárbbu hárjehallanbáikái ruovttugilis.

– Dasa lea leamašan dárbu, mun lean dan jagi leamašan guovtti cupas dušše vuodjime ovdal cuppa Guovdageainnu gos munnje lihkostuvai vuoitit. Lean fárus leamašan vuodjime Avvilis ja Kirkonjárggas, muhto ii hal daid sáhtte lohkat hárjehallat. Dal mun gal áiggun hárjehallat nu ollu go vejolaš, čilge Olsen.

Son lea movttet vaikke dán bievllas eai leat šat gilvovuodjimat dán valáštallamis:

– Vaikko eai leat ge šat vuodjimat dán jagi de lea goit buorre go beassat hárjehallat, vuodjimat dat gal leat fas boahtte jagi.

 

– Boahtte jagi árat ohcat

Maiddái Kárášjoga Mohtorsearvvi jođiheaddji Per Tommy Eideng lea movttet.

– De dal de lea illu mis. Máŋgii leat mii geahččalan ohcat lobi hárjehallat čáhcecrossa jávrriin, muhto eat leat lihkostuvvan. Dál de viimmat oaččuimet dieđu ikte Kárášjoga gielddas ahte addet midjiide vuodjinlobi. Ii daga maidege vaikke diehtu bođii ná maŋŋit, mii áigut goitge hárjehallat dassá jávri jiekŋu. Ja boahtte jagi dieđusge maid fertet árra giđa juo ohcat lobi, vuodjimat lávejit álgit miessemánus juo, čilge Eideng movttegit.

 

(Ášši joatká gova vuolábealde)


Kárášjoga Mohtorsearvvi jođiheaddji Per Tommy Eideng.
Vuorkágovva

Hárjehallán eará báikkis

Dássážii leat Kárášjoga čáhcecross vuoddjit šaddan hárjehallat Suomas. Vaikke Suopma ii leat guhkkin eret Kárášjogas, de liikká lea leamaš guhkki čáhcecross vuddjiide vuolgit hárjehallat eará báikái.

– Mii leat moddii leamašan Suoma bealde hárjehallamin, muhto dat gal ii leat nu buorre leamašan. Dat láve dávjá go de lea ollen hárjehallanbáikái de cuovkana skuter ja dat šaddá beare guhkki ovddas ruoktot vuoddjit, go šaddá divvut álgit skutera, muitala Mohtorsearvvi jođiheaddji Eideng.

-Almmuhus-