Odne lea juste 50 jagi gollan dan rájes go Láhpoluobbala kapealla vihahuvvui. Mannan sotnabeaivvi ledje ávvudoalut, gosa ledje boahtán valljit olbmot.
Odne lea juste 50 jagi gollan dan rájes go Láhpoluobbala kapealla vihahuvvui. Mannan sotnabeaivvi ledje ávvudoalut, gosa ledje boahtán valljit olbmot.
Klemet Johansen Hætta Sámemišuvnnas lei mielde lágideamen ávvudoaluid, ja son gal lea hui duhtavaš.
– Mu mielas ledje hirbmat buorit doalut, olbmot bohte valljis sihke Guovdageainnus ja Kárášjogas, soite birrasii 70 olbmo, buohkaide ii lean čohkkánsadji ge, muitala son.
Ávvudedje
Láhpoluobbala kapealla vihahuvvui njukčamánu 15. beaivvi 1967:s, dalle ii lean Hætta dain doaluin.
– Mun in lean dalle gártan dohko, muhto mu váhnemat gal leigga vissa doppe, muitala son.
Sotnabeaivvi lágidedje Láhpoluobbala gilisearvi ja Sámemišuvdna ávvudoaluid ovttasráđiid.
Álggos lei ipmilbálvalus kapeallas ovdal go manne gilivissui, ovddeš skuvlii, gos ledje mállásat.
– Doppe beasaimet maid gullat dološ fearániid, dearvvuođaid ja nu ain viidásat, muitala Hætta.
(Ášši joatká gova vuolábealde)
– Olusat gávdnan jeđđehusa dáppe
Dán áigge ii geavahuvvo kapealla nu dávjá, muhto juohke jagi lágiduvvo ainjuo «Duottardeaivvadeapmi» man Guovdageainnu ja Kárášjoga searvegottit ovttasráđiid lágidit.
Vaikke ii leat šat nu dávjá anus, de Hætta goitge lohká kapeallas leat mearkkašumi olbmuide.
– Vuohččan dat go kapealla lea Láhpoluobbalis, de dat muitala ahte dáppe sárdniduvvo Ipmila sátni, lohká Hætta.
– Jáhkán ahte olusat leat dáppe gávdnan jeđđehusa iežaset beaivválaš hástalusaid siste, son lasiha.
Váillahedje suohkanpolitihkkáriid
Hætta muitala doaluide boahtán sihke dábálaš olbmuid, muhto maiddái servodatovddasteddjiid.
– Muhto mii váillaheimmet gal suohkanpolitihkkariid, lohká son.
– Čáppa kapealla
Son muitala olbmuid, geat bohte doaluide, leat rábmon go dolin leat leamaš čeahpit hutkat gokko ceggejit kapealla.
– Luodda ráhkaduvvui juste dan guora, lohká son.
Hætta lohká iežas mielas kapealla leat fiinnisin.
– Dat lea fiidnát heivehuvvon dan lundui mii Láhpoluobbalis lea, das eai leat alla toartnat ja nu ain. Lea čáppa kapealla, man leat bures áimmahuššan, oaivvilda son.