Nu dadjá Porsáŋggu Bargiidbellodaga sátnejođiheaddjievttohas, muhto deattuha ahte ii hálit ovdalgihtii ávvudit.
Nu dadjá Porsáŋggu Bargiidbellodaga sátnejođiheaddjievttohas, muhto deattuha ahte ii hálit ovdalgihtii ávvudit.
– Skuvlaválggain birgiimet hui bures, nu ahte sávan dát doallá deaivása odne maid. Mis ledje maid buorit bohtosat válgaiskosis man NRK Sápmi almmuhii borgemánus. Olusat geat ipmirdit válgaiskosiid, lohket dán leat jáhkehahttin danne go das ledje jearahallan 10 proseantta álbmogis, ja go iskkus čađahuvvui nu láhka válggaid. Nu ahte áinnas jáhkán min miela mielde mannat, muhto in áiggo ovdalgihtii einnostit, vuorddán dassái go jienat leat lohkkon. Lean hui gealdagasas, dadjá Aina Borch.
Porsáŋggu Bargiidbellodaga Aina Borch lea dálá sátnejođiheaddji Knut Roger Hanssena (Olgešbellodagas), stuorámus hástaleaddji dán jagi gielddaválggain.
Porsáŋggu skuvlaválggain oaččui Bargiidbellodat 41,6 proseantta jienain ja vuittii čielgasit skuvlaválggaid. Olgešbellodat ges oaččui nubbin eanemus jienaid 32,8 proseanttain.
– Šaddá miellagiddevaš gullat válgabohtosiid. Mus lea hui buorre dovdu go leat olusat lohkan min áigut jienastit ja olusat lohkan ahte dáhttot rievdadusaid. Seammás diehtit ahte buot bellodagat leat dahkan buori barggu válgagiččus, erenoamážit dál loahpas. Orru guovttegávdnái gosa állanit dat jienasteaddjit geat ain leat eahpádusas, lohká Borch.
– Rievtti mielde dovddan ahte lean hui lotkat, go mii leat leamaš áŋgirat válgagiččus. Mii leat oasálastán olu lávddiin, sihke mediain, sosiála mediain, olbmuiguin deaivvadan márkanis ja galledan olbmuid. Mii leat dahkan dan maid sáhttit čalmmustit iežamet politihka ja jus dat ii doalaš gitta lohppii de ii leat barggu duohken goit leamaš, de leat eará áššit váikkuhan. Jus álbmot dáhttu eará go min boahttevaš njeallje jagi de vuhtiiválddán dan, loahpaha Borch.
