Ávvir lea dál vuorbádan geat vuite bileahtaid Isac Elliot konsertii.
Ávviris lea leamaš gilvu mas guovttis leat sáhttán vuoitit bileahtaid Isac Elliot gilvui.
Okta gilvu lei Instagram govvajuohkinbálvalusa bokte, gos gilvaleaddjit galge juohkit gova dahje filmmaža mas čájehit man háliidit oahpahit Isac Elliotii. Gilvui bohte 17 gova ja filmmaža ja vuoiti lea 12-jahkásaš Elina Johansen Ijäs, guhte lea Guovdageainnus eret.
– Wow, oi. Dan in livčče gal jáhkkán ge, dadjá Elina go Ávvir riŋge sutnje muitalit bohtosa.
– Mun ráhkistan du
Elina lea ráhkadan filmmaža mas muitala ahte háliidivčče oahpahit Isac Elliota dadjat «mun ráhkistan du» sámegillii. Filmmas lea son ráhkadan bustávaid iežas rupmašiin ja lasihan dasa vel Isac Elliot musihka.
– Mus lei okta olmmái veahkkin ráhkadit filmmaža, ádjáneimme moadde diimmu govvet olgun ja das oidno veaháš ahte sevnnjoda. Dasto ádjáneimme vel nuppi beaivvi čuohppat ja heivehit filmma, muitala Elina guhte dál illuda konsertii vuolgit.
– Mun ledjen duo dalle su konsearttas Levis, ja dat lei somá. Dál illudan seamma olu gaskavahkku konsertii, muhto lea nu somá go eat dárbbaš mátkkoštit gosage go konsearta lea dáppe Guovdageainnus, dadjá son.
SMS-gilvu
Nubbi gilvu lei ges SMS-gilvu mas galggai vástidit golmma gažaldahkii.
Rivttes vástádusat leat:
1. Isac Elliota vuosttaš singel almmuhuvvui guovvamánus 2013:s.
2. Sámás Muinna kampánjalávlagis gullo Slincraze.
3. Diibmá vuittiiga Aila Duo Sámi Grand Prix lávlunoasi, ja Jørgen Stenberg ges juoiganoasi.
SMS-vuoiti
Maiddái dán gilvvu vuoiti leat vuorbádan ja vuoiti das lea Ellen Ánne Ristiinná Eira, guhte lea 24 jagi boaris ja Guovdageainnus eret.
– Oho, oi, dat gal lei somá, dadjá son go Ávvir de viimmat fáhte su ságaide.
Ellen Ánne Ristiinná lohká iežas somá dihte searvan gilvui vai beassá vuolgit iežas biiggáiguin konsertii jus vuoitá. Ieš lea gal 10 jagi boarrásat go Isac Elliot.
– Jua, dan mun gal lean, muhto de lean goit fitnan su konsearttas, illuda son.
Vuoitolihkku
Go Ávvir hálešta suinna de lea son aitto gullan ahte lea maiddái FeFo gilvvu vuoitán, maiddái das lea Isac Elliot bileahtta vuoitun, nu leat sus guokte bileahta dán konsertii maid lea guovtti gilvvus vuoitán.
– Mus ii leat goassege leamaš vuoitolihkku, muhto dál gal gusto lea dat jorggihan, čaibmá son ja nu beassá ge muhtima váldit fárrui vel konsertii.
