Vaikke lei dát jahki go Ivguvuona jogaid birra galget sáhttit lohkat ahte ii leat šat luossadávda doppe, de šaddet dál maŋidit dan ávvudeami.
2016: ja 2017:s bidje eiseválddit mirkko earret eará Gálgojohkii, Stuoravuona suohkanis, mii golgá giláža Ivgobađa čađa, vai galget visot guolit jápmit jogas. Mihttu dainna lei jávkadit luossadávdda Gyrodactylus salaris. Jávkadit visot guliid mirkkohuhttima bokte moadde jagi, dat lea dat áidna vuohki jávkadit dan dávdda jogain.
Dan dahke Galgojogas, ja maid eará jogain guovllus ja das maŋás galggai dat johka guorosin čuožžut, ja de leat álggahan barggu joga fas ealáskahttit.
Dán jagi galge ávvudit go johka fas rahppo. Nu liikká ii šaddan, go dutkit leat gávdnan juoidá mii ii leat nu go galgá.
Sivvan dasa lea go dutkit leat gávdnan veajehiid mat leat 5 jagi boarrásat, mii mielddisbuktá ahte sáhttet eallán soames meađđemat dahje guolit dan mirkkohuhttimis. Danin šaddet vel gozihit jogaid guovllus vel ovtta jagi, vai leat sihkkarat ahte ii leat šat dávda jogain doppe.
Dan dieđiha Romssa ja Finnmárkku Stádahálddašeaddji.
