Várut liikii beaivvádagas ja fina doaktára luhtte iskame lea go dus liikeborasdávda.
Várut liikii beaivvádagas ja fina doaktára luhtte iskame lea go dus liikeborasdávda.
Norggas lea okta dain riikkain gos buot eanemus liikeborasdávda lea olbmuin mii lea jámolaš.
Juohke jagi ožžot badjelaš 1700:s eamidielkoborasdávdda, ja badjel 300 olbmo jápmet dan sivas.
Ollugat bohtet iskosii
Miessemánu 6.beaivvi lea liikeiskanbeaivi ja liikedoaktárat miehtá riika isket eamidielkkuid nu ahte ii dárbbat doaktárgohččuma.
– Leat ollugat diŋgon áiggi iskosii, muitala Borasdávddasearvvi generálačálli Anne Lise Ryel. Moatti beaivvis válde birrasiid 4000 olbmo oktavuođa Borasdávdatelefuvnnas ja buot doavttirdiimmut divve jođánit.
Álttás čađahuvvo liikeiskanfálaldat miessemánu 7.beaivvi.
Fuomášit borasdávddaid
Diibmá gávdne badjel 10 proseantta liikerievdademiid olbmuin geat fitne sin luhtte.
– Diimmá akšuvnna maŋŋel válde eanet olbmot oktavuođa, muitala Ingrid Roscher gii lea liikedoavttir Rikshospitálas ja našunála jođiheaddji Liikeiskanbeaivvi. Son sávvá dán jagi akšuvnna oažžut olbmuid čuovvut mielde ja oaidnit ferte go iskat liikii.
Dehálaš máhttit
– Lea dehálaš diehtit maid galgá bargat ja goas ferte doaktára lusa mannat, lohká Roscher ja joatká:
– Eamidielkoborasdávdda lea álki dikšut jus fuomáša árrat dan, muhto sáhttá duođalaš váikkuhus jus boahtá iskat beare maŋŋit ja borasdávda lea beare guhkás jo ollen gorudis. Leat erenoamážiid dievddut, ovttaskas dievddut, geat beare maŋŋit fitnet doaktára luhtte.
Liikeiskanbeaivi lea europálaš akšuvdna man namma lea Euromelanoma, ja badjel 30 riika leat mielde akšuvnnas.
Finnmárkkus leat liikedoaktárat Álttás ja Girkonjárggas geat fállet liikeiskosiid akšuvnna olis.
