Sáhttá šaddat máŋga diimmu vuordit go áigu duoddariid badjel vuodjit go lea ráidovuodjin. Stáda geaidnodoaimmahat buktá rávvagiid olbmuide geat fertejit ráidovuodjima čuovvut.
Sáhttá šaddat máŋga diimmu vuordit go áigu duoddariid badjel vuodjit go lea ráidovuodjin. Stáda geaidnodoaimmahat buktá rávvagiid olbmuide geat fertejit ráidovuodjima čuovvut.
– Dálki ja siivu rievddada jođánit váriin, ja lea maid dávjá fáhkka biilavuddjiid mielas, dadjá Therese Thowsen, gean bargu lea čuovvut johtolaga birrajándora Stáda geaidnodoaimmahaga viđa johtolatguovddážis.
Boahtá das galle vuojána leat ráidovuodjimis ja makkár vejolašvuohta lea gádjut olbmuid jus ráidu darvána dálkái.
Sáhtát seastit áiggi
– Dakkár beivviid go lea ollu johtolat luotta alde, de sáhttá šaddat vuordináigi jus ferte ráidovuodjima čuovvut. Sáhttá seastit áiggi jus vállje eará luotta vuodjit, vaikko soaitá guhkit vuodjit dakko, dadjá Thowsen.
Ferte dohkkehit jus luodda giddejuvvo, ii ge vuojistit meattá luoddacakkiid. Muhtin báikkiin ii leat vejolašvuohta garvit ráidovuodjima go eai leat eará luottat maid sáhttá vuodjit ja mat leat rahpasat. Dalle ferte bures ráhkkanit, dahje geahččat sáhttá go maŋidit vuolgga gitta šaddá buoret dálki.
Gávdno maid neahttasiidu Stáda geaidnodoaimmahagas gos sáhtát oaidnit web-kameragovaid mat aiddo leat govvejuvvon iešguđet guovlluin. Das oainnát sullii makkár dálki báikkis lea.
Stáda geaidnodoaimmahaga ráđit ráidovuodjima ektui:
• Várut ahte lea doarvái bensiidna/diesel biilla táŋkkas.
• Lea buorre jus lea čuovga, goaivu ja geasehanbáddi sadjágasas.
• Buorre jus lea mielde biebmu ja liegga jugus.
• Váldde mielde liegga biktasiid ja buriid dálvegápmagiid.
• Bija galbmaáimmu bossut lásiide vai láse ii jieŋo.
• Bija biilla heahtečuovgga coahkkit.
• Lea ge fal nu lahka biilla mii du ovddabealde lea, vai it masse biilla oainnus.
• Doalat dássedis leahtu ja čuovo ráiddu.
• Ale vuojis eret ráiddus ja ale geahččal jorggihit.
• Jus fertet bisánit, dahje jus ráidu bisána, de it ábut guođđit biilla. Sáhttá šaddat váralažžan.
Logenbiilavuoddjit sáhttet gieldit biilavuddjiid čuovvumis ráiddu, geat sáhttet geavvat bárttiid sisa. Sáhttet leat olbmot geain eai leat doarvái liegga biktasat, vuojánat main leat teknihkalaš váilevašvuođat, dahje vuojánat mat eai leat dálvvi ládje ráhkkanan deahkaid ektui.
Geahča Stáda geaidnodoaimmahaga ráidovuodjinfilmmaža dás:
