Riikkaidgaskasaš iskkadeapmi galgá čilget Kultur-Sámi birgejumi koronaheahtedilis, dieđiha Sámiráđđi preassadieđáhusas.
Sámiráđđi, Norgga beale Sámediggi, Sámi dáiddárráđđi ja Sámi Internašunála filbmainstituhtta bovdejit dál sámi dáidda- ja kultursuorggi váldit oasi oktasaš iskkadeamis mii galgá čalmmustahttit Kultur-Sámi birgejumi koronaheahtedilis.
– Nu go muđuid ge kultureallimii, de lea koronapandemiija garrasit čuohcan maiddái Kultur-Sápmái. Seammás vásihit ahte doaibmabijut, mat galget veahkehit kultureallima dán dilis, eai leat doarvái bures heivehuvvon sámi kulturbargiide ja sámi kulturinstitušuvnnaide geat barget riikkarájáidrasttildeaddji suorggis, čilge Sámiráđi kulturossodaga hoavda, Christina Hætta.
Servodatgidden sáhttá goaridit suorggi
Christina Hætta lohká sin dál ballat ahte dramáhtalaš servodatgidden, riikkarájáid gidden ja koronaheahtedoaimmat sáhttet bissovaččat goaridit suorggi. – Mii eat dieđe man guhká pandemiija bistá, eat ge dieđe doarvái bures movt dat čuohcá Kultur-Sápmái. Lea dehálaš midjiide gulahallat ovttaskas kulturbargiiguin ja sámi kulturinstitušuvnnaiguin vai oažžut gelbbolašvuođa movt koronaheahtedilli čuohcá sidjiide ja makkár kulturpolitihkalaš strategiijaid mii dan vuođul galgat láhčit, muitala Hætta.
Sávvet oallugiid searvat
Sámiráđđi, Norgga beale Sámediggi, Sámi dáiddárráđđi ja Sámi Internašunála filbmainstituhtta sávvet oallugiid searvat iskkadeapmái mii álggahuvvo suoidnemánu 2. beaivvi ja bistá borgemánu 17. beaivái. – Iskkademiin ádjána gaskal 5-10 minuhta, ja mii sávvat oallugiid váldit áiggi muitalit movt koronadilli čuohcá sidjiide, ja buktit evttohusaid doaibmabijuide mat sáhttet sin doarjut hástaleaddji áiggis, lohká Hætta.
