Dál lea Sámi Musihkkafestivála duođaštan ahte beakkán Suoma šarmøra Isac Elliot čuojaha Báktehárjjis gaskavahkku cuoŋománu 1. beaivvi.
Sámi Musihkkafestivála buvttadeaddji Nils Johan Vars lea aitto duođaštan ahte sii leat ožžon beakkán Isac Elliota boahtit Guovdageidnui beassážiid.
Elliot čuojaha Báktehárjjis gaskavahkku cuoŋománu 1. beaivvi, muitala Vars preassadeaivvadeamis Guovdageainnu nuoraidskuvllas juste dál.
Govven: Ovlla Gaup
Nieiddažat oaguhit
Mannan vahkkoloahpa lei dát násti Romssas, gos duhahat ledje boahtán su gullat Vinterlyd konsearttas. Juohke sajes gos son lea, čirrot nuorra nieiddat go oidnet su, ja viegahit su vai beasaše oainnestit su sihke ovdal ja maŋŋel konsearttaid. Olles valvi lei Romssas boahtán girdišilljui go son ollii, ja Elliot fertii Twittera bokte ávžžuhit iežas fanssaid mannat ruoktot, go ollusat ledje vuordán su beaivvi miehtá dan hotealla olggobealde gos navde su orrut.
