-Almmuhus-
OĐĐASATIrgala sámegielat jienasteddjiide

Irgala sámegielat jienasteddjiide

-

-

Romssa Gurutbellodat lea ráhkadan čoahkkáigeasu válgaprográmmas sámegillii. Sidjiide lea lunddolaš čalmmustahttit sámevuođa go Romsa lea Norgga stuorámus sámegávpot.

Vuohččan lea Romssa Gurutbellodat deaddilan válgaprográmma maiddái sámegillii. Bellodaga váldoprográmma lea dárogillii, muhto sii leat maiddái fuomášan ráhkadit das čoahkkáigeasu sihke sámegillii ja eŋgelasgillii.  

 – Mii leat ovttasráđiid sátnejođiheddjiin Jens Johan Hjortain hábmen ja suhkan gáddái ovttasbargošiehtadusa Sámedikkiin, ja dán háliideimmet man nu láhkai čuovvolit maiddái válgagiččus.

 

Romsa lea gávpotsuohkan gos ásset eanemus sámit olles Norggas ja dalle han lea áibbas lunddolaš čalmmustahttit sámevuođa, danin fuomášeimmet sámegillii ráhkadit čoahkkáigeasu iežamet válgaprográmmas

Jonas Stein

 

Čevllohallet ja hástalit earáid

Jonas Stein lea Romssa gávpotráđđi geas lea ruhtadanovddasvástádus, ja čavčča gielddaválggain lea son Gurutbellodaga vuosttaš evttohus. Son muitala ahte sin bellodagas leat sámegielagat geat leat hábmen gihppaga sámegillii, dáinna gal čevllohallá.

 – Mii sávvat ahte sámegielagat lohket gihppaga, dat gávdno digitála hámis, muhto mii juohkit dan maiddái politihkalaš válgabevddiin ja sáhttit sáddet olbmuide geat dan sihtet. Mun sávan ahte eará Romssa bellodagas maid fuomášit ja čuovvolit min, hástala son.

 

Ii dieđe lea go ávkin

Gurutbellodaga njunuš politihkkár bohkosta go jearralan sáhttá go sámegiel válgaprográmma geažil oažžut eambbo jienaid, dása ii loga diehtit vástidit, muhto son muitala ahte gávdnojit olu liberála sámit.

 – Guovdageainnus ja Kárášjogas dahká Gurutbellodat buori barggu. Finnmárkku politihkkáriid mielas lea buorre go Romssas leat deaddilan válgaprográmma maiddái sámegillii, ja dieđán ahte min miellahtut čevllohallet dáinna, lohká Stein.

 

Áinnas digaštallá šiltema

Gurutbellodahkii lea dehálaš ovdánahttit sihke sámi mánáidgárde- ja skuvlafálaldaga Romssas. Sii dáhttot maiddái seailluhit ja ovdánahttit sámi giela ja kultuvrra, ja válgaprográmmas čállet ahte lea dehálaš ásahit sámi deaivvadanbáikki Romsii. Dasa lassin lohká Stein ahte háliidit eanet sámegiel šilttaid gávpoga almmolaš visttiide.

 – Dán áigodagas leat ihtán olu šiltat sámegillii, ja mii háliidit joatkit galbet sámegillii doppe gos lea lunddolaš, lohká son.

 

– Naba báikenammašilttaid?

– Šilten ferte dáhpáhuvvat positiivvalaš vuoiŋŋain. Mannan válggaid maŋŋá oahpaimet ahte lea dehálaš gulahallat ja láhčit dili nu ahte sámevuohta šaddá lunddolaš oassin min gávpogis. Mii dovdat leat rievttes geainnus dán barggus, muhto mii gal áinnas digaštallat báikenammašilttaid, loahpaha Jonas Stein.

 

(Ášši lea almmuhuvvon báberaviissas 13.08.15)

-Almmuhus-