Jus iPada ii sihkkaraste biillas, de dat sáhttá leat heaggaváralaš, váruha dáhkádusfitnodat.
Juohke čihččet váhnen diktá mánáid geavahit dávviriid biilamátkkis mat eai leat sihkkarastojuvvon, čájeha guorahallan man Norstat čađahii Codan dáhkádusfitnodaga ovddas 2019:s.
Dál váruha dáhkádusfitnodat olbmuid ja rávve sin sihkkarastit luovos dávviriid.
– Jus biila vuodjá 50 kilomehtera diimmus ja gártá goazastit, de «lossot» luovos dávvirat 30. gerddiin. Dat mearkkaša ahte neahttabreahta dahje čáhcebohtal mii deaddá kilobeali, šaddá 15 kilosažžan jus girdá biilastuolu sealgái dien leahtus. Jus biila vuodjá 70 kilomehtera diimmus ja gártá goazastit, de lossot dávvirat vel beliin, ja neahttabreahtta deaddá jo 30 kilo, dadjá Codan Forsikring gulahallanhoavda Georg Richvoldsen preassadieđáhusas.
Hálbbes dáhkádus
Guorahallan čájeha ahte 62 proseantta váhnemiin diktet mánáid geavahit luovos dávviriid muhtimin dahje dávjá, 8 proseantta ges álo ja 30 proseantta ges eai suova goassege geavahit dávviriid mat eai leat sihkkarastojuvvon.
– Biilamátkkit šaddet dávjá ráfálebbon ja mánát eai vuorjja biilavuoddji jus besset geavahit iPadaid ja mátketelefovnnaid vuojedettiin, muhto lea dattege hui dehálaš ahte váhnemat eai vajálduhte sihkkarastit dáid dávviriid. Dávvir mii gidde neahttabreahtta biilastullui lea hálbbes dáhkádussan jus jurdila man váralaš iPada sáhttá go goazasta. Sáhttá jurdilit ahte berre sihkkarastit buot dávviriid maid ii háliit iežas oaivái jus dat bálkkestuvvojit 10 mehter allodagas, lohká Richvoldsen.
