Innlandet fylkkadiggi mearridii juovlamánu 14. beaivvi Innlandet máttasámegielnama mii lea Sisdajve ja fylkkagieldda namma galgá Sisdajven fylhkentjïelte. Dál sáddejit nammaevttohusa ohcamuša Gielda- ja guovlodepartementii. Doaivumis šaddá máttasámegielnamma almmolaš namman jagi 2025.
Jus departemeanta dohkkeha Sisdajve ja Sisdajven fylhkentjïelte nama, de galgá namma biddjot fylkkadiggevissui ja logoide ja sáhttá maid váikkuhit geaidnogalbbaide. Fylkkagielda ovttasbargá Engerdal gielddain gos eanaš máttasápmelaččat Innlandet fylkkas ásset. Engerdal háliida maid šaddat sámegielhálddašangieldan nu mo kránnjágielda Rossen tjïelte/Plassje gielda, dieđiha fylkkagielda ruovttusiiddus.
Dorjo evttohuvvon namaid
Nammaevttohusat sáddejuvvojedje gulaskuddamii mannan geasi ja buot vástádusat dorjo evttohuvvon namaid: Innlandet – Sisdajve, Innlandet fylke – Sisdajven fylhke, Innlandet fylkeskommune – Sisdajven fylhketjïelte.
Innlandet fylkkagielddas ja Sámedikkis leat guokte ovttasbargosoahpamuša.
– Innlandet lea sámi fylka ja sápmelaččat leat min eamiálbmot. Ovttasbargošiehtadusain Sámedikkiin lea fylkadiggi geatnegahttán iežas ovddidit sámegiela, lohká Bargiidbellodaga áirras, Mona Cicilie Stormoen.
Ovddádusbellodaga áirras Truls Gihlemoen ii dorjon máttasámegielnama.
