-Almmuhus-
-Almmuhus-
KULTUVRA Inga oahpai njoaro­stit Norgga­meaštáris

Inga oahpai njoaro­stit Norgga­meaštáris

-

-

Go Romssa mánát bovdejuvvojedje njorostallat mannan vahkkoloahpa, de lei Norggameašttir Maja Oline Sarre sin oahpaheaddjin. Su mielas lea dehálaš oahpahit dán árbevieru viidáset ja sávvá dáinna lágiin movttiidahttit eambbosiid njorostallat.  

Sotnabeaivvi álggii Sámi vahkku Romssas, ja dan oktavuođas bovdii Norgga árktalaš universitehtamusea mánáid njorostallanskuvlii. Museašiljus lei mokta ja mánát gal háliidedje oahppat njoarostit. 

5-jahkásaš Inga ii leat goassege ovdal njoarostan, muhto go vuos oahpahalai njámmat suohpana ja njoarostit, de gearggai oktii maiddái darvehit «bohcco». 

– Dát gal lei hirbmat somá Ingai. Son illá háliidii vuos searvat go orui veahá váttis, muhto son oahpai njoarostit. Mu mielas lea dát máilmmi buorre fálaldat mánáide ja lea hui buorre go musea lea rabas ja ahte dollet nuvttá doaluid dás olggobealde, dadjá eadneolmmoš Elin Gustavsen. 

STOHKE: Maŋŋel go mánát ledje ieža hárjehallan njoarostit, de besse vel stoahkat. Mánát ledje «bohccot» ja Norggameašttir Maja Oline Sarre njoarostii dassážii go buohkaid lei darvehan gitta. Govven: Kila Anti 
STOHKE: Maŋŋel go mánát ledje ieža hárjehallan njoarostit, de besse vel stoahkat. Mánát ledje «bohccot» ja Norggameašttir Maja Oline Sarre njoarostii dassážii go buohkaid lei darvehan gitta. Govven: Kila Anti 

Čeahpes bagadalli 

Mánáid ledje juohkán joavkkuide ja juohke joavku beasai vel stoahkat maŋŋel go ledje oahpahallan njoarostit. Mánát besse leat boazun ja museaoahpaheaddji Maja Oline Sarre, gii maiddái lea Norggameašttir, njoarostii dassážii go darvehii buot mánáid. 

– Lei oba somá stoahkat boazun, ja nuppes ii galggašii mu nagodit njoarostit gitta, dadjá 5-jahkásaš Oscar. 

Son lea boahtán museašilljui iežas jumešbeliin Abeliin ja etniin, gii lea duhtavaš njoarostallanfálaldagain. 

– Oba somá go Norggameašttir oahpaha mánáid njoarostit, son lei erenomáš čeahppi. Mu mielas lei hui somá fitnat dáppe ja dál han leat sámi doalut juohke áidna beaivvi olles vahkku, lohká Vilde Fjellheim Wold. 

SUOHTAS: Jumežat Oscar (gurut bealde) ja Abel (olgeš bealde) leaba gergosat stoahkat maŋŋel go leaba vuohččan oahpahallan njoarostit. Sudno mielas lei somá fitnan museašiljus. Govven: Kila Anti 
SUOHTAS: Jumežat Oscar (gurut bealde) ja Abel (olgeš bealde) leaba gergosat stoahkat maŋŋel go leaba vuohččan oahpahallan njoarostit. Sudno mielas lei somá fitnan museašiljus. Govven: Kila Anti 

Mánát liikojit njoarostit

Norgga árktalaš universitehtamusea oahpaheaddji ja Norggameašttir njorostallamis, Maja Oline Sarre, lea duhtavaš mánáiguin ja dadjá iežas liikot oahpahit earáide njoarostandáiddu. 

– Mu mielas lea hirbmat somá mánáid oahpahit njoarostit go sii leat hirbmat árjjalaččat ja liikojit njorostallat. Smávimusaide lea dieđusge veahá váddásat oahpahit njoarostallama, muhto go sii besset oaivái bidjat čorvviid ja stoahkat boazun, de gal lea buot buorre. sii liikojit viehkat ja mun dal njorostalan sin gitta. Dat lea hui buorre aktivitehta sidjiide, muitala Sarre. 

OAHPAHEADDJI: Norggameašttir njorostallamis Maja Oline Sarre dat doalai njoarostallanskuvlla mánáide ja bearrašiidda. Su mielas lea somá earáide oahpahit njoarostit. Govven: Kila Anti 
OAHPAHEADDJI: Norggameašttir njorostallamis Maja Oline Sarre dat doalai njoarostallanskuvlla mánáide ja bearrašiidda. Su mielas lea somá earáide oahpahit njoarostit. Govven: Kila Anti 

Mánnávuođa rájes njoarostan

Maja Oline lea máŋgii šaddan Norggameašttirin njorostallamis ja son lea ge njorostallan mánnávuođa rájes. 

– Min ruovttus, Deanus, lei njorostallan hui dehálaš aktivitehtan ja dasa oahpásmuvven oba unnin. Lávejin njorostallan guktii-golbmii vahkkui. Maiddái valáštallansearvi Deanu searat leat mu movttiidahttán ja áŋgiruššan njoarostit. Mii láviimet kombineret njoarostallama čuoigamiin ja viehkamiin, dadjá Maja Oline Sarre, guhte lea bures birgen gilvvuid oktavuođas maid. 

– Nuorran váldigohten njoarostallama hui duođas ja mearridin ahte háliidan vuoitit gilvvuid. Mun birgejin hui bures ja vuiten olu. 

VALÁŠTALLI: Maja Oline Sarre álggii njoarostit mánnán ja muitala ahte hárjehalai guovtte-golmma gearddi vahkkui. Dás leamaš ávki go son lea olu gilvvuid vuoitán. Govven: Kila Anti 
VALÁŠTALLI: Maja Oline Sarre álggii njoarostit mánnán ja muitala ahte hárjehalai guovtte-golmma gearddi vahkkui. Dás leamaš ávki go son lea olu gilvvuid vuoitán. Govven: Kila Anti 

Gilvvohallagođii fas ollesolmmožin

Maŋŋel go Maja Oline šattai ollesolmmožin, de váillahišgođii njoarostallama. Danin searvagođii fas gilvvuide. 

– Dán jagi gal dieđusge leat šluhtten Norggameašttirgilvvuid njorostallamis, muhto daid gilvvuid vuiten sihke diibmá ja ovddit jagi. Mu mielas lea hui somá njorostallat, muhto in njoaros gal beare dávjá. Láven veahá hárjehallat ovdal gilvoáigodaga, lohká ja son ja dadjá ahte galggašii stuorát njoarostanbiras. 

– Dalle livččen várra mun ge njoarostan veahá dávjjit. Mu mielas livččii hui dehálaš movttiidahttit eambbosiid njoarostit áimmahuššan dihte dán kultuvrra. Mun jáhkán ahte lea ávkin lágidit sullasaš doaluid go odne ja galggašii maid čatnat njoarostallama eará aktivitehtaide, nu go čuoigamii ja viehkamii. Dat livččii hui dehálaš sámi kultuvrii. Mu mielas láve maid hui somá jus eará guovllu olbmot háliidit oahpahallat njoarostit ja mun gal áinnas láven olgoriikalaččaide maid oahpahit njoarostallama. Dat han lea hirbmat somás aktivitehta, loahpaha Maja Oline Sarre. 

VÁILLAHII: Ollesolmmožin váillahišgođii Maja Oline Sarre njoarostallama ja álggii danin fas gilvvohallat. Son šattai Norggameašttirin sihke diibmá ja ovddit jagi. Govven: Kila Anti 
VÁILLAHII: Ollesolmmožin váillahišgođii Maja Oline Sarre njoarostallama ja álggii danin fas gilvvohallat. Son šattai Norggameašttirin sihke diibmá ja ovddit jagi. Govven: Kila Anti 
-Almmuhus-