Nu lohká Guovdageaidnulaš Niillas Jovnna Länsman gii bođii nubbin maŋábeallai ovdagihtii favorihta, Deatnulačča Morten Bliena, otná čáhcecrossa norggameašttirgilvvuin Guovdageainnus.
Nu lohká Guovdageaidnulaš Niillas Jovnna Länsman gii bođii nubbin maŋábeallai ovdagihtii favorihta, Deatnulačča Morten Bliena, otná čáhcecrossa norggameašttirgilvvuin Guovdageainnus.
Länsman lea hui duhtavaš nubbin sajiin, ja lohká ledje njeallje buori vuoddji finálas.
– Heajos álggu dihte ii lean otne vejolaš vuoitit, go šadden maŋemussii ja gevven oaguhit. Šattai gaskka njunnožii ja lei váttis joksat de, danne lean hui duhtavaš nuppi sajiin, lohká son.
Ovdánan vuodjimiin
Länsman lohka Blien dieđusge vuittii, muhto lea hui duhtavaš go nagodii čuovvut su iige báze šat nu bearahaga.
– Dat lea somá go lean ovdánan vuodjimiin ja oaidnit ahte mánná rievttes guvlui, inge leat šat nu ollu maŋŋelis, lohká Länsman.
(Ášši joatká gova vuolábealde)
Ovddemusas álggus lohppii
Morten Blien lea hui duhtavaš vuoittit, ja erenoamážit go lea skohteriin bártidan eksosahoidduin olles beaivvi.
– Oaččuimet luoikkas sveisenapparáhta báikkálaš divohagas, ja de divuimet skohtera. Skohter manai de albmaládje ja ožžon buoremus vuolgga finálas ja bessen ovddemussii, lohká Blien. Nu doalaige son vuosttaš saji gitta mollii ja vuittii.
(Ášši joatká gova vuolábealde)
Válljejedje vuddjiid
Čáhcecrossagilvvut ledjege maid kvalifiseren Eurohpámeašttirgilvvuide. Leif Viklund Eurohpámeašttirgilvvuid organisašuvnnas muitala Ruoŧas leat juo guhtta vuoddji gergos EM, Suomas ges lei Avvilis gilvu gos njeallje suoma vuoddji kvalifiserejedje, ja doppe maid kvalifiseriiga Morten Blien ja Niillas Joavnna Länsman. Snoasas ges kvalifiseriiga Kim Strandheim ja Per Tommy Eideng.
– Otne ovdal gilvvuid vuddjiidčoahkkimis jerrui gažaldat vuddjiiguin, leago sin mielas oktage gii sin mielas galggašii njuolga beassat EMii. Vuoddjit ovttajienalaččat evttohedje ahte Joachim Olsen ja Inge Hansen galgaba beassat EMii, vaikko movt manašii otná gilvvuin, muitala Eklund.
(Ášši joatká gova vuolábealde)
Vuolgá geahččalit vuoitit
Niillas Jovnna Länsman muitala ahte áigu boahtte jahkái vel garraseappot ráhkkanit, ráhkadit stuorat mohtora skohterii vai oaččo buoret álgguid gilvvuin. Son lohká ii galgga beare guhká ovdal birge Blieniin, ja guovtti váhku geahčen lea sus vejolašvuohta fas gilvalit, Eurohpámeašttirgilvvuin Jyväskyläs, Suomas.
– Mohtorsportas ii dieđe goasse movt manná, ja mun gal áiggun dieđusge geahččalit váldet gollii ja vuoitit doppe, lohká Länsman.
Gearggus gilvalit
Morten Blien lohká iežas gearggus Eurohpámeašttirgilvvuide.
– Dovddan iežan hui gearggus, lean duhtavaš skohteriin. Mus lei otne veaháš bávččas oalgi, muhto gal dat buorrána ja jáhkán de lean oalle gearggus eurohpámeašttirgilvvuide.
Govaid čáhcecrossas oainnát dáppe: http://avvir.no/content/govat-cahcecrossas-lavvordaga
