Gáldu váldodoaimmaheaddji ja sámedikkepolitihkkár Láilá Susanne Vars lea otná geassegilvvu oasseváldi.
Gáldu váldodoaimmaheaddji ja sámedikkepolitihkkár Láilá Susanne Vars lea otná geassegilvvu oasseváldi.
Namma: Láilá Susanne Vars
Ahki: 38
Guovlu: Guovdageaidnu
Bargu: Gáldu váldodoaimmaheaddji
Álggos leat golbma gažaldaga, jus daid máhtát, de manat viidáseappot gilvvus.
1. Goas lea riikkaidgaskasaš nissoniidbeaivi?
– Oo, movt bat dal lea ge diet. Lei go son dat njukčamánus 8. beaivvi. Nu mun geahččalan vástidit.
Riekta
2. Guđe jagi dohkkehuvvui Isak Saba «Sámi soga lávlla» almmolaš sámi našunálalávllan?
– Ohoi, dien gal berrešin diehtit. Dat lei vissa seamma jagi go sámi leavga dohkkehuvvui. Mun vástidan 1986.
3. Joatkke dan sátnevádjasa: «Dat guhte dollii njulče, dat buollá ja gii čáhcái manná, dat…»
– Na njuoská.. Diet gal lei beare váttis, in leat gullan dien ovdal. Dat varra njuoská.
Rievttes vástádus: Heavvana.
Go Vars ii vástidan riekta buot golbma vuosttaš gažaldaga, de son ii mannan viidáset gilvvus. Muhto son beassá geahččalit vástidit ovtta árvalusa mainna sáhttá oažžut 5, 10 dahje 15 čuoggá, dan mielde makkár ivnni vállje. Rukses árvalus lea váddáseamos, ja jus dan vástida riekta de oažžu 15 čuoggá. Alit árvalusain oažžu 10 čuoggá ja ruoná árvalusain 5 čuoggá.
Láilá Susanne Vars válljii alit ivnni, ja de oaččuige dán árvalusa:
Mii lea mii lea jorbbas dego spábba ja guhkki dego girkotoardna?
– Na mii ipmašiid bat dat lea … Na. Diet gal lei váttis … Ii leat okta ge mus dáppe veahkkin dál. Mun in dieđe.
Rievttes vástádus: Láigenođđu.
Galle čuoggá oktiibuot: 2 čuoggá.
– Mun gal lean hui čuorbi árvalusain. Mu nieiddaš láve jearahallat mus árvalusaid, in ge láve máhttit. Muhto diekkár historjjálaš beliid láven oalle bures muitit, jahkeloguid ja sámi historjjá. Sátnevádjasiin in leat gusto nu čeahppi go ledjen doivon. In mun dál lean ollen ráhkkanit gilvui go fáhkka riŋgestii mátketelefuvdna, lohká Vars ja bohkosa.
Juohke gilvaleaddji beassá hástalit ođđa gilvaleaddji Ávvira geassegilvui ja Láilá Susanne Vars háliida hástalit iežat bargoskihpára Brita Åse Norlemann.
– Mun dieđán gal ahte son lea barggus dál, muhto gal su oačču veahá vuorjat dal, son vissa liiko issorasat go Ávvir riŋgesta sutnje, lohká Vars vel loahpas.
Ávvira geassegilvvu njunnošis lea:
Láilá Susanne Vars: 2 čuoggá
Ášši lea maiddái otná báberaviissas.
