-Almmuhus-
VALÁŠTALLAN– In leat ožžon jearaldaga

– In leat ožžon jearaldaga

-

-

Isak Ole Hætta, gean olusat navdet nammaduvvot Sámi riikkajoavkohárjeheaddjin, ii loga iežas jerron dán ámmáhii. Son dattege lea jurddašan geaid háliidivččii riikkajovkui čohkket:

Ikte čáliimet ahte FA Sámis váilu sihke ruhtadeapmi, hárjeheaddji ja joavku ovdal go sáhttet CWFC:ii vuolgit, seammás go NRK Sámi Sáhka Váibmosis prográmmas ges gohčodedje Isak Ole Hætta riikajoavkohárjeheaddjin.

– Jua, lea duohta ahte gohčodedje mu danin. Muhto in leat FA Sámis ožžon jearaldaga álgit hárjeheaddjin. Lea nu aitto čielgan ahte FA Sápmi beassá Conifa World Football Cupii, nu ahte eai soaitte vuos geargan bargat dieinna, lohká Isak Ole Hætta.

 

Isak ole hætta «Niehkojoavku»

Tom Høgli, FC København

Hans Norbye, Tromsø IL

Magnus Andersen, 

Thomas Braaten, Hønefoss/BK

Vegard Braaten, Alta IF

Erik Lamøy, Sandefjord Fotball

Jonas Lantto, Gefle IF

Jarkko Lahdenmäki, Rovaniemen Palloseura

Tor Martin Mienna, Tromsdalen Fotball

 

– Livččii niehku dáid čohkket

Vaikke ii leat ge vel jerron hárjeheaddji ámmáhii, de son dattege lea jurddašan geaid háliidivčči oaidnit čiekčamin Sámi riikkajoavkkus geasset. Listtu oainnát olgešbealde.

– Livččii niehku nagodit dieid čikčiid čohkket, de gal jáhkán Sámis livččii buorre joavku, lohká Hætta, guhte lohká Sámis gávdnot olu buriid spábbačikčiid. 

 

Loga maid: Áiggošedje searvat muhto váilu ruhtadeapmi, hárjeheaddji ja joavku

 

Čiekčamiid galggašii sirdit

2014:s Sápmi gárttai logádin dáin čiekčamiin mas 12 joavkku leat mielde. Okta sivvan dasa go riikkajoavku ii lihkostuvvan buorebut dalle, lei go eai nákcen oažžut sámi buoremus čikčiid jovkui. Dat boahtá ges dat go CWFC lágiduvvo dan áiggis go davviriikkain ain leat ráidočiekčamat.

– Dál lea seamma váttisvuohta. Alimus ráiddus lea maŋimus čiekčan miessemánu 29. beaivvi, go CWFC álgá. Nu ahte buoremus čiekčit eai soaitte sáhttit leat mielde goit čiekčamiid álggus, lohká Hætta, guhte máŋgii lea cuiggodan dan go dát máilmmiviidosaš čiekčamat lágiduvvojit soamehis áiggis.

– Mun lean ieš maid ovddidan ConIFA:i ahte čoavddus livččii sirdit cupa geassemánu lohppii dahje suoidnemánu álgui, dalle livččii sámi joavkkus maid vejolaš oažžut buoremus čikčiid mielde go ráidočiekčamiin lea dalle boddu.

 

Hættas liikká sávvá FA Sámi nagodit čohkket buriid čikčiid:

– Jus buoremus čiekčit jerrojuvvojit ja háliidit čiekčat riikkajoavkkus, ja jus spábbačiekčansearvvit luvvejit sin dan boddii, de sáhttá FA Sápmi nagodit čohkket buori joavkku, lohká Hætta. 

 

Ferte árvvoštallat jus jerro

Hætta doaimmai ge sámi riikkajoavkku hárjeheaddjin 2014:s go FA Sápmi lei mielde Conifa World Football Cupas (CWFC) mii lágiduvvui Staares, Ruoŧas. Olusat navdet su dán vuoru maid nammaduvvot hárjeheaddjin.

– Mus lea gal hui miella vuolgit jođihit riikkajoavkku, muhto leat olu bealit mat fertejit čielgat ovdal go dasa sáhtášin lohpidit. Fertešin de oaidnit leago vejolaš oažžut virgelobi iežan beaivválaš barggus. Dasa lassin ferten maid guorahallat ahte leago oadjebas mátkkoštit Abkhasiai gos dán jagáš Cupa lágiduvvo, čilge Hætta.

Ievttá Sáhka Váibmosis gullui ahte Norgga Olgoriikka Departemeanttas eai ávžžut mátkkoštit Abkhasiai, Georgiai.

– Gullen ahte dáhkádusat eai soaitte gustovaččat jus liikká mátkkošta dohko. Seammás gullojedje lágideddjiid bealis dáhkideamen guovllus leat ráfi ja olu turisttaid geaseáiggi. Nu ahte diet leat maid bealit maid ferten árvvoštallat jus jerron vuolgit, čilge Hætta.

 

 

 

-Almmuhus-