Álggos leat golbma gažaldaga, jus daid máhtát, de manat viidáseappot gilvvus.
Álggos leat golbma gažaldaga, jus daid máhtát, de manat viidáseappot gilvvus.
Namma: Joret Mihkkal Bals
Ahki: 33
Guovlu: Guovdageaidnu
Bargu: Studeanta
1. Mii lea roavgu?
– Roavgu? In leat goasse gullan ge, lei amas. Leago juogalágan guolli? BOASTUT!
Rievttes vástádus: sávccanáhkkegovččas, oađđádat
2. Lea go Bossa Nova muhtin suolu?
– Ii, dat lea dánsa. RIEKTA!
Olles vástádus: Lulli-amerihká dánsun vuohki
3. Deatnogáttenuoraid lávlla “Dánsalávlla” álgá ná: «Dánsestetne, dánsestetne….» Movt joatká lávlla? (Unnimusat 2 čuovvovaš sáni)
– Ruškes čalmmát, alit čalmmát..
Ii, čáhppes čalmmát nieida, lávlesta Bals. RIEKTA
Go Bals ii vástidan riekta buot golmma vuosttaš gažaldahkii, de son ii mannan viidáset gilvvus. Son dattetge beassá geahččalit vástidit árvalusa mainna sáhttá fasket 5, 10 dahje 15 čuoggá. Dát lea dan duohken guđe ivnni vállje. Rukses árvalus lea váddáseamos, ja jus dan vástida riekta de oažžu 15 čuoggá, alit árvalusas faske 10 čuoggá ja ruonás ges 5 čuoggá.
Bals vállje rukses ivnni, ja mii jearrat sus dán árvalusa:
Oainnát gal dan, muhto gitta it oaččo. Mii lea dat?
– Suoivvanas, vástida Bals jođánit. RIEKTA!
– Dát goit manai bures, dušše dat roavgu sátni lei munnje amas. Jus leaččan gullan dan ovdal, in leat goit bidjan muitui dan sáni.
Galle čuoggá oktiibuot: 17 čuoggá
Juohke gilvaleaddji beassá hástalit ođđa gilvaleaddji Ávvira geassegilvui, ja Bals háliida hástalit Issát Ailo Gaupa searvat Ávvira geassegilvui.
Njunnošis Ávvira geassegilvvu dál: Ánne Márjá Guttorm Graven 21 čuoggáin.
(Dát ášši lea almmuhuvvon Ávvira báberáviissas lávvardaga borgemánu 1. beaivvi)
