Ávžilaš Berit Sara Skum Turi illosii go su máhccojuvvon mielkepáhkain vuittii 10.000 ruvnno.
Ávžilaš Berit Sara Skum Turi illosii go su máhccojuvvon mielkepáhkain vuittii 10.000 ruvnno.
Berit Sara Skum Turi Ávžžis Guovdageainnus eret oinnii Vefas bláđis ahte oažžu čállit nama ja telefunnummára máhccojuvvon mielkepáhkaide ovdal go bidjá kartoŋgadoabbara sehkkii.
Dáinna vugiin sáhttá vuoitit 10.000 ruvnno, maid Vefas vuorbáda viššalis mielkepáhkkamáhccuid gaskkas.
Nu son álggii dahkat, ja fáhkkestaga rikkui 10.000 ruvnnuin Vefas IKS gilvvus. Ieš muitala Biret Sárá go Ávvir riŋge sutnje:
– In lean vuordán ahte boađán vuoitit dainna, ja fertejin jearrat sis lea go duohta go ožžon dan somás dieđu Vefasis. Muhtumin in leat muitán čállit nama mielkepáhkkii, ja lean heaitán ja fas álgán, muitala Biret Sárá gii lea guhká jo máhccon mielkepáhkaid.
Earát oidnet ávkki
Moadde vahkku áige bođii Vefasis diehtu facebookas ahte Guovdageaidnulaš Berit lei vuoitán ruhtasupmi, mii oaččui olbmuid imaštit gii dat Biret dahje Berit lea, go ii leat nu hárvenaš namma suohkanis.
– Lean suovvan almmuhit iežan nama vuoi earát oidnet ahte lea ávki sirret doabbariid ja čállit iežas nama mielkepáhkaide, muitala viššalis Biret Sárá Ávvirii.
Ollu vuoitit
Returkartonglotteriija, mii lea vuorbádeapmi mas addet ruhtavuoittuid 1,6 miljovnna ovddas, lea čađahuvvon 1997 rájes. Juohke jagi vuorbádit vuoittuid ja 124 olbmo vuitet ruhtavuoittuid gilvvus maid Grønt Punkt Norge hálddaša.
– Sii geat leat viššalat sirret kartoŋggaid sáhttet oažžut fiinna bálkkašumi go servet birasgáhttemii, lohká Siw Line Thomassen Vefas iks:as preassadieđáhusas.
