Ikte dát nuorra nieida vuittii bálkkašumi “Jagi moallavákta 2015”, ii ge loga dolkan vuoitimis.
Ikte dát nuorra nieida vuittii bálkkašumi “Jagi moallavákta 2015”, ii ge loga dolkan vuoitimis.
Guovdageaidnulaš sámenieida Marja Sofie Holmestrand Hætta (20), gii lea čiekčame Fløya (dál jo sáhttá dadjat vuosttáš divišuvnnas) nissonspábbačiekčanjoavkku ovddas dán spábbačiekčan áigodagas, oaččui ikte bálkkašumi “Jagi moallavákta 2015” man jahkásaččat addá OMT Spábbačiekčansiidu (OMT Fotballside). OMT Spábbačiekčansiidu lea neahttasiidu mii čalmmustahttá ja berošta báikkálaš dási spábbačiekčamis Romssa guovllus Norgga beale Sámis.
– Hui miellagiddevaš
Earret Marja Sofie Holmestrand Hætta “Jagi moallavákta” bálkkašumi sáhtaše vuoitit Tone Elvik Sannerholt ja Ingunn Stenersen. Muhto álbmotjienasteapmi čájehii ahte vuoitin šattai Marja. Su jienastedje 340:s, Tone Elvik Sannerholt oaččui fas 86 jiena ja Ingunn Stenersen 132 jiena. Ná vástida Marja Sofie Ávvira jearaldahkii mo lei vuoitit.
– Hui miellagiddevaš. Somá go olusat jienastedje mu, muitala nuorra moallavákta.
– In dolkka vuoitimis!
Ná lohká Marja Sofie go jerren it go dolkka oažžumis bálkkašumiid ja vuoittuid? Marja Sofie Holmestrand Hætta lea earret eará ožžon Nilut Joavkkus valáštallanbálkkašumi jagis 2013, seammá jagis ges šattai Norggameašttirin (vuollel 19 jagi nieiddaide) go čievččai Grand Bodø nieiddaidjoavkkus.
– In leat dolkan! Dát baicce movttiidahttá eambbo hárjehallat. Danne go dat maid čájeha ahte olbmot beroštit mus, ja čuvvot spábbačiekčamiid. Dát beare movttiidahttá hárjehallat viidásit, čilge Holmestrand Hætta.
Posted by Marja Sofie Holmestrand Hætta on 4. November 2013
Boahtá Nilut Cupii
Holmestrand Hætta lea jo várren áiggi Nilut Cupii, spábbačiekčan dáhpáhussii mii lágiduvvo Guovdageainnus 13.-15. beivviid dán mánus.
– Mun gehččen jo geat galget čiekčat dán háve Nilut Cupas . Váttis dadjat guđe joavku vuoitá. Gelddolaš oaidnit, loahpaha “Jagi moallavákta 2015” vuoiti Marja Sofie Holmestrand Hætta.
