-Almmuhus-
-Almmuhus-
MAGASIIDNA – In dieđe manne lean bovdejuvvon šlohttii

– In dieđe manne lean bovdejuvvon šlohttii

-

-

Duorastaga doalai gonagas ja dronnet doaluid šloahtas, gosa ledje 1500 guossi bovdejuvvon. Olu sápmelaččat ledje bovdejuvvon doaluide, 14-jahkásaš Aina Emilia lei okta sis.

Aina Emilia Siri Bals ja su váhnemat Ante ja Biret Ellen Aina Siri Bals manne duorastaga iđida Osloi.

Sii ledje erenoamáš earánis, go nieiddaš lei bovdejuvvon šlohttii doaluide.

– Mun in dieđe vuoiga manne mu leat bovden, dušše bođii bovdehus. Šadden dieđusge hui movttet, orui hui somá ja illudan doaluide, muitalii Aina Emilia Ávvirii ovdalaš doaluid mat álge diibmu 14.00 ja biste 16.00 rádjái.

 

Gealdagasas

Juohke fylkkas ja Svalbárddas ledje 50 olbmo bovdejuvvon, oktiibuot 1500 olbmo, mihttu lei ráhkadit minitatyr Norgga.

Gonagas ja dronnet bovdiiga dáid gussiid dan oktavuođas go ieža ávvudeaba ahte leaba 25 jagi leamaš truvnnus.

Go gonagaspárra čađaheigga iežaska ávvumátkki Norgga rittu mielde geasset, de lágiduvvojedje gárdinfeasttat buot gávpogiin maid galledeigga.

Aina Emilia lohká iežas leat gealdagasas, ja lea diehttelasat gávtti nahkehan.

– In leat goassege leamaš šloahtas ovdal nu ahte lean gealdagasas, lohká son.

 

Váhnemat mielde

Váhnenguovttos leaba maid mielde, go bovdehusas čuoččui ahte váhnemat fertejit mielde jus bovdejuvvon guossit leat vuolleahkásaččat.

Ieš ii loga diehtit maid galggaš lohkat jus beassá gonagasain sáhkalaga.

– Mun in vuoiga dieđe maid galggan lohkat. Ferten oaidnit jearrá go maidege, lohká son ja jáhkká iežas beassat gonagasain háleštit.

Doalut ledje Dronnetpárkkas šloahta olggobealde.

 

Olgeš politihkkára nieida AUF:s

Aina Emilia lea Ante Bals nieida, ja Bals lea dovddus go lea leamaš sámeáššiid stádačállin Olgešbellodaga ovddas.

Ieš Aina Emilia ges lea AUF (Bargiidbellodaga nuoraidsearvvi) miellahttu, ja Ávvir jearrala ahte sáhttá go dan dihte leat bovdejuvvon šlohttii:

– Dan in dieđe, sáhttá dan dihte, lohká nieiddaš, ja muitala ahte soai láveba áhčiinis digaštallat maiddái politihka muhtimin.

– Jus lean leamaš čoahkkimiin, de lávejetne sáhttit digaštallat, muhtimin letne ovttaoaivilis, muhto rievtti mielde ean leat gal nu dávjá ovttaoaivilis, lohká son ja čaibmá.

 

 

- Advertisement -
-Almmuhus-