-Almmuhus-
OĐĐASAT– In bala leat soađis, balan baicce ruoktot boahtit 

– In bala leat soađis, balan baicce ruoktot boahtit 

-

-

Gieskat bođii ovdan ahte Sandra Andersen Eira lea mannan Ukrainai. Ávvir lea háleštan suinna, ja son muitala ahte lea baicce ballu boahtit ruoktot go lea leamašan soađis.

Sandra Andersen Eira lea 35 jagi boaris ja lea Porsáŋggus eret. 2017:s válljejuvvui Sámediggái gos ovddastii Norgga Sámiid Riikkasearvvi ja lei ealáhus- ja kulturlávdegotti ja váldoealáhuslávdegottis lahttu.

Dál lea gávtti rádjan eret ja coggan ruoná suodjalusbiktasiid badjelasas. Gieđas lea bissu. Nu oidno govain mat leat sosiála mediain nu go su iežas Instagrámma profiillas.

Sandra Andersen Eira muitala ahte ii bala leat soađis. Eira ja su joavku leat leamašan Ukrainas badjelaš mánu.

– Balan boahtimis ruoktot.  In leat goassege dovdan eanet oadjebassan go iežan joavkkuin ja Ukraina veagain njunnošis. Dieđán orru ártet dadjat dan go bombejuvvo beaivválaččat ja lean soađis. Muhto jus juoidá vuorjá mu, dalle lea vuolgit ruoktot. Mii leat normála dán maŋŋá? dadjá Eira.

Loga maid:
Sámi politihkkár molssui eret gávtti soahte­gárvvuide

Son dadjá ahte illá nagoda smiehttat leat joavkku haga ja háleštit olbmuiguin geat eai ádde mo doppe lea.

– Vahkku dáppe lea dego mánnu, ja mánnu lea dego jahki. Visot darvána muitui, leat eará duohtavuođas dáppe. Ferte eallit dainna maid oaidná ja dovdá soađis, dat gal dieđusge rievdada olbmo máŋgga láhkai. Ii leat juoidá maid sáhttá čilget jos ii leat leamašan dáppe ja vásihan ieš dan, dadjá Eira.

Sandra Andersen Eira (olgeš bealde) báhčimin Ukrainas. Priváhta govva.
Sandra Andersen Eira (olgeš bealde) báhčimin Ukrainas. Priváhta govva.

Mannan veahkkin

– Okta sivva manin lean vuolgán deike lea go dovden ahte lean morálalaččat geatnegahtton dahkat dan. Oktii áiggis dárbbašeimmet mii veahki ja olbmot veahkehedje, dál lea áigi ahte mii bargan dan seamma. Nubbi lea go lea kránnjáriika man birra hállat, jos eat bisset sin dál, gos de galgá bisánit, muitala Eira.

Son muitala ahte goalmmát sivva lea go Ukraina presideanta lea leamašan ovdagovva dálá politihkalaš máilmmis.

– Duosttan kánske dadjat ahte soames eará máilmmejođiheaddjit livčče páhkken ja vuolgán. Son oaččui vejolašvuođa, muhto válljii bissut ja čájehit man ovddas Ukraina soahtá. Dan oaidnit maid sis geaiduin leat deaivvadan, leat hirbmat duostilat ja giitevaš olbmot geat ánssášit buot veahki maid sáhttet oažžut, dadjá Eira.

Álki beassat mielde

Lei meaddin mii dagahii ahte su identitehta šattai dovddusin. Ieš lei dušše muitalan villjii ja oappáide ahte lei doppe. Ii lean jurdda vuorjat geange.

– Ledjen smiehttan leat dáppe ráfis ja bargat iežan barggu. In boahtán Instagram-govaid ja dovddusvuođa dihtii. Leat bargan nu ahte ii oktage dieđe geat mii leat, muhto lei meaddin ja go vahát lea juo dahkkon, de ferte beare leat.

Son muitala ahte lea leamašan álki beassat mielde. Válddii oktavuođa ambassádadevrrain gii bargá oažžut guhtege gosa galgá iežas duogáža ja ovddeš vásáhusaid ektui, gos oažžu buot reaidduid ja sáhtu maid dárbbaša. 

-Almmuhus-