Romssa fylkkaráđi mielas lea šállošahtti go Sámedikki ealáhus- ja kulturlávdegoddi doarju Sámediggeráđi árvalusa heaittihit fástaruhtadeami girjebussiide 2020 rájes.
Romssa fylkkaráđi mielas lea šállošahtti go Sámedikki ealáhus- ja kulturlávdegoddi doarju Sámediggeráđi árvalusa heaittihit fástaruhtadeami girjebussiide 2020 rájes.
Sámediggi diŋgui iskkadeami 2016:s mii čájehii ahte girjebusset leat erenomáš dehálaččat sámi girjjálašvuođa ja kultuvrra gaskkusteamis.
Guorahallamis ávžžuhuvvo doalahit ruhtadeami.
– Lea imaš go Sámediggi oanehis áigge maŋŋel vállje hilgut iežaset guorahallama, lohká Romssa kultur- ja ealáhusfylkkaráđđi Sigrid Ina Simonsen preassadieđáhusas.
Dárbu doalahit
Sámediggi oasseruhtada sihke Davvi-Romssa ja Mátta-Romssa girje- ja kulturbussiid gos mánát ja nuorat besset luoikkahit maiddái sámi girjjiid.
Jus ruhtadoarjja bissehuvvo, de sáhttá girjebussedoaibma heaittihuvvot Davvi-Romssas.
– Lea áibbas dárbbašlaš doalahit ja ovddidit dálá doaimma sámi girjebussiin, ja dasa ferte gávdnat heivvolaš ruhtadanortnega, lohká Romssa fylkkaráđijođiheaddji Willy Ørnebakk.
Romssa fylkkas vásihit ahte eambbosat atnet ávkki girjebussiid sámi fálaldagas ja dat lea erenomáš dehálaš mánáidgárde- ja skuvlamánáide.
