-Almmuhus-
-Almmuhus-
OĐĐASATIlus go besset doarjut sámi kultur­eallima máŋggabealat­vuođa

Ilus go besset doarjut sámi kultur­eallima máŋggabealat­vuođa

-

-

Sámediggeráđđi lea juolludan doarjagiid iešguđetlágan kulturdoaimmaide, ja stuorra oassi lea jurddašuvvon mánáide ja bearrašiidda.

– Mun lean ilus go Sámediggi beassá doarjut sámi kultureallima stuorra máŋggabealatvuođa. Dat lokte min kultuvrra, ja addá sihke sápmelaččaide ja earáide buriid vásáhusaid, lohka sámediggeráđđi Maja Kristine Jåma (NSR) preassadieđáhusastis. Gávcci iešguđet kulturdoaimma leat ožžon doarjaga, dás vuollelis beasat lohkat man olu ruđa guhte ge lea ožžon. 

Čájáhus

Emma Sofie Joma Rustad oažžu 52 000 kruvnnu doarjaga bearaščájálmassii «Dålle/Dolla». Čájáhusa vuolggasadji leat sámi myhtat ja cukcasat, ja lea erenoamážit heivehuvvon mánáide ja nuoraide. Dat čájehuvvo vuosttaš geardde Gïelevåhkoe/sámi giellavahkkus golggotmánus.

 OŽŽON DOARJAGA: Bearaščájálmas «Dålle/Dolla» oažžu 52 000 kruvnnu doarjaga. Preassagovvva: Emma Sofie Joma Rustad
OŽŽON DOARJAGA: Bearaščájálmas «Dålle/Dolla» oažžu 52 000 kruvnnu doarjaga. Preassagovvva: Emma Sofie Joma Rustad

Mánáidfilmma dubben

Duottar studio oažžu 100 000 kruvnnu mánáidfilmma dubbemii. Maŋimus jagi lea Duottar Studio dubben máŋga mánáidfilmma sámegillii. Dainna jotket dievaslaččat ja dál lea Oscar-nominerejuvvon filmma «Wolfwalkers» vuorru dubbejuvvot.

Elliidmáinnas

Sámi Lávdi – Sámi Association of Performing Arts lea ožžon 70 000 kruvnnu doarjaga interaktiiva installašuvdnii ja performancii «Flokken/Eallu». Prošeakta lei oassi Vårscenefestenis Romssas. Čájálmas lea elliidmáinnas sámi artisttaiguin ja neavttáriiguin geat čuojahit ja nektet dego eallun.

Dáiddaprošeakta

«Passing Through Landscape» lea tekstiila- ja mote- hábmejeaddji Ramona Salo ja lihkadanhábmejeaddji ja lihkastatdáiddára Katarina Skår Lisa ovttasbargu. Soai oažžuba 23 000 kruvnnu oasálastimiin iežaska dáiddaprošeavttain Ravnedans Festivalas Kristiansandas mannan geasi.

Ingunn Svanes Alvedal lea ožžon 150 000 kruvnnu čájálmasprošektii «We come from the other side», mii čájehuvvo Palais des Nations Genèves International Academy of Ceramicsa 50. kongreassas «Melting Pot» čakčamánu gaskkamuttus.

Doarjja golmma konsertii

Sámediggeráđđi lea maid juolludan 145 000 kruvnnu doarjaga golmma konsertii sámi musihkkáriiguin. Suortta Jazz ja viseklubb ja Romssa riikkaidgaskasaš girkofestivála ožžot 25 000 kruvnnu doarjaga guhte ge, ja Saemien Studeenth Tråantesne leat ožžon 95 000 kruvnnu lágidit konseartta Jijjen Tjakttjen Tjåaghkoes, mii lágiduvvui borgemánus.

Suortta Jazzfestivála lea bálkáhan musihkkára Frode Fjellheima ovdanbuktit musihka su almmuhemiiguin Aejlies Gaaltije ja Biejjien Vuelie, ja lassin vel ođđa musihka. Fjellheimas lea juoigi Ulla Pirttijärvi ja soprána Adrian Angelico mielde. Festivála lágiduvvo čakčamánu 20.–24. beaivvi.

Musihkar Georg Buljo ovttas Nidarosdomen oratorie- koarain čájehit bihttá diŋgojuvvon buktagis «Kalvskinnsangen» George Buljo bokte, Romssa riikkaidgaskasaš girkofestiválas golggotmánu 29. beaivvi 2022.

– Sámi musihkkarat leat bivnnuhat, ja ohcaluvvojit máŋgga sajis. Dássi mii čájehuvvo iešguđetlágan festiválain ja konsearttain movttiida vel eanet sámi luođi ja musihka buvttadit, dadjá sámediggeráđđi Maja Kristine Jåma.

-Almmuhus-