Ievttá stádabušeahttasoahpan buvttii buriid ođđasiid sámi áviissaide. Ságaha váldodoaimmaheaddji dattege ii livččii ovdalgihtii jáhkkit ahte ráđđehus mas Ovddádusbellodat lea oassin, juolluda lasáhusa sidjiide.
Ievttá stádabušeahttasoahpan buvttii buriid ođđasiid sámi áviissaide. Ságaha váldodoaimmaheaddji dattege ii livččii ovdalgihtii jáhkkit ahte ráđđehus mas Ovddádusbellodat lea oassin, juolluda lasáhusa sidjiide.
Diibmu 19 ikte eahkes ledje viimmat ráđđehusbellodagat Olgeš ja Ovddádusbellodat ja sin ovttasbargoguoimmit Gurut ja Risttalaš álbmotbellodat, gergosat almmuhit loahpalaš stádabušeahta jagi 2016 várás.
Sin soahpamuš lei illusáhkan sámi áviissaide, go das vuoruhuvvo sámeáviissaide lasihit juolludeami guvttiin miljovnna ruvnnuin. Ságaha váldodoaimmaheaddji Geir Wulff lohká iežas leat giitevažžan:
– Dat gal lea dieđusge hui stuorra illusáhkan midjiide, čájeha ahte erenoamážit Risttalaš álbmotbellodat lea ádden sámi áviissaid dili ja man dehálaččat mii lea sámi servodahkii. Leat hui giitevaččat go leat vuoruhan min, lohká Wulff.
Ovddádusbellodat mielde dás
Stuorradiggebellodagaid gaskkas leat erenoamážit Risttalaš álbmotbellodat (RáB) ja Sosialisttalaš Gurutbellodat vuoruhan sámi áviissaid iežaset bušeahttaárvalusain. Risttalaš álbmotbellodat leage okta ráđđehusbellodagaid ovttasbargoguimmiin, ja danne giitá ge Wulff erenoamážit dán bellodaga go leat čuollan sámeáviissaid beali bušeahttaráđđádallamiin.
Boađus orro ge dál šaddamin ahte Ráđđehus, mas Ovddádusbellodat lea mielde, lasiha sámeáviissaid juolludeami 2 miljovnna ruvnnuin.
– Juste dat lea jurddašanveara, bealistan in livččii jáhkkit ahte manná ná. Muhto mii diehtit ahte RáB dat lea ovddidan dán ášši ja dorjon min bušeahttasoabadallamiin, lohká Wulff.
Váttis leamaš
Diibmá ráđđehusbellodagat Olgeš ja Ovddádusbellodat, árvaledje unnidit juolludeami sámi áviissaide 4,1 miljovnna ruvnnuin. Dalle maid nagodedje RáB ja Gurutbellodat bissehit dán čuohppama, ja doarjja bisui baicce seamma dásis go ovddit jagi ge. Duohtavuođas mearkkašii dát ahte juolludeapmi lei birrasiid miljovnna ruvnnu unnit go dábálaš haddegoargŋun.
– Lea leamaš hui váttes jahki go diibmá eat ožžon lasáhusa, boahtte jagi buorrána dilli dáinna lasáhusain, lohká Wulff guhte lei maid jo jurddašišgoahtán čovdosiid jus lasáhus ii lean boahtit:
– Mii leimmet gártat geahpedit doaibmamet ja leimmet soaitit šaddat maid cealkit eret olbmuid virggiin.
