Sámediggeráđđi addá 400 000 ruvnno doarjjan Deanu gildii Sirpmá skuvlaovddidanprošektii, mas válddahuvvo ahte lea sámi giellaovddideapmi ja oahppoplánaid heiveheapmi oktan skuvlafálaldahkan Norgga-Suoma riikaráji rastá.
Prošeavtta ulbmilin lea oččodit ásahuvvot oktasaš rájárasttideaddji sámi skuvlafálaldaga, ráhkadit ođđa sosiála fierpmádaga ja nannet oktasašvuođadovddu dán guovtti skuvlla gaskka, Sirpmá skuvlla Deanu gielddas ja Ohcejoga skuvlla Suoma bealde, čállá Sámediggi preassadieđáhusastis.
– Dát lea deaŧalaš davviriikkalaš ovttasbargu oahpahussuorggis, ja mii oaidnit ahte lea ávki ovttas bargat davviriikkalaš dásis oktasaš skuvlapolitihka ektui sámi giela ja sámi árvvuid vuođul, dadjá sámediggeráđđi Mikkel Eskil Mikkelsen.
Prošeavttas lea árvu
Sámediggi 2017:s álggahii prošeavtta man oktavuođas Sámediggi ovttas sámi vánhemiiguin/fuolaheddjiiguin ja skuvlafágalaš aktevrraiguin Suomas ja Ruoŧas, barget dan ala ahte oažžut áddejumi makkár skuvlapolitihkalaš hástalusat sámiin Suomas ja Ruoŧas leat ja mainna lágiin ovttas sáhttá bargat sámi skuvlafálaldaga ovddidemiin.
Dáinna prošeavttain lea jotkojuvvon 2018:s.
– Sámediggeráđđi oaidná ahte Deanu gieldda prošeavttas lea sirdinárvu eará vejolaš rájárasttideaddji ovttasbargoprošeavttaide sámi oahpahusas. Mii oaidnit maiddái ahte Sámediggái sáhttá leat ávki prošeavtta dieđuin ja vásihusain, ja das sáhttá leat sirdinárvu min prošektii mas ovddidit viidáset rádjaskuvlaovttasbarggu, dadjá Mikkelsen.
