Álttá joatkkaskuvlla drámáklássa ohppiin lea hušas giđđa. Disdaga čájehit sii bihtá «Skyggene ser oss» Guovdageainnus kulturviesus ovdal go bijadit bihtáin Osloi.
Álttá joatkkaskuvlla drámáklássa ohppiin lea hušas giđđa. Disdaga čájehit sii bihtá «Skyggene ser oss» Guovdageainnus kulturviesus ovdal go bijadit bihtáin Osloi.
Álttá joatkkaskuvlla drámáklássa lea válljejuvvon oassálastit našunála DUS-festiválii bihtáin «Skyggene ser oss» Det Norske Teateret lávddis Oslos. DUS-festivála lea miessemánu 7.-9. beivviid. Ovdal dan, miessemánu 5. beaivvi, bohtet sii Guovdageidnui Beaivváš Sámi Našunálateáhter lávdái bihtáineaset.
Áhčis lávddis
Ivan Aleksander Buljo vázzá nuppi jagi Álttá joatkkaskuvllas drámásuorggi (2DRA). Son lohká dalle go galggai Romsii, de son balai, ja dál ballá vel eanet.
– Ballen dalle, dovddan balan eanet dál go galggan Guovdageidnui Beaivváža lávdái. Boares olbmát besset mu geahččat lávddi alde ja áhčči maid, lohká Ivan Aleksander gii lea Beaivváš Sámi Našunálateáhtera neavttára, Nils Henrik Buljo bárdni.
– Veahá balan go áhčči maid lea das ja illudan maid. In lean doivon goasse dan dáhpáhuvvat ahte galggan seamma lávddis neaktit go áhčči. Dat mii leat earenoamáš čájáhusas Guovdageainnus lea ahte hupmat veahá sámegiela. Mii leat golmmas geat hupmat sámegiela, lohká Ivan Aleksander. Earret su de leaba deatnulaš Aina Helene Guttorm Einarsen ja guovdageaidnulaš Ronja Kristine Gaup Larsen maid sámegielagat.
– Lea nu gelddolaš ja mii illudit čájehit bihtá ja ballat maid. Guokte beaivvi maŋŋel vuolgit Osloi. Ovtta ládje šaddá disdaga dego «Skyggene ser oss» generálageahččaleapmi ovdal go neaktit Norgga teáhteris Oslos, dadjá Ivan Aleksander Buljo.
Besse viidáseappot
Ivan Aleksander Buljo muitala sis leat hui hušša dál ja ollu bargu, go leat hárjehallame vel nuppi bihtá. Drámásuorggis leat 14 oahppi vuosttaš (1MDA) ja nuppi (2DRA) klássat ja sii ožžo Unge scenes mánusa. Njukčamánu čájehedje sii bihtá Hålogalándda Teáhteris Romssas gos maid ledje guhtta eará joavkku.
– Doppe ledje guhtta eará joavkku ja dušše okta joavku beasai viidáseappot ja dat leimmet mii. Lei nu gelddolaš go juste mii válljejuvvuimet ja beassat ovddidit Romssa ja Finnmárkku, lohká Ivan Aleksander Buljo.
Teáhterbihtá «Skyggene ser oss» lea Hans Petter Blad čállán ja dat lea Rakela birra gii láhppo giellamátkkis. Su olbmát geat leat báhcán, vásihit duohta tragediija. Geassi vássá ja olbmát vuorddašit oavdudagu, juoidá eará.
Den Unge Scene lea riikaviidosaš nuoraidteáhterprošeakta ja dat diŋgo ja ovdánahttá teavsttaid mat leat čállojuvvon nuoraide ja maid nuorat galget ovdanbuktit. Ulbmil lea movttiidahttit nuoraid buvttadit nuoraidteáhtera.
