Áhkárvuona bajásšaddanguovddážis barget áŋgirit searvadahttima ja dásseárvvu, dál sáhttá skuvla oažžut 250.000 ruvdnosaš bálkkašumi dán ovddas.
Áhkárvuona bajásšaddanguovddážis barget áŋgirit searvadahttima ja dásseárvvu, dál sáhttá skuvla oažžut 250.000 ruvdnosaš bálkkašumi dán ovddas.
Bealli Áhkárvuona bajásšaddanguovddáža skuvlaohppiin lea minoritehtaduogáš, danin lea searvadahttin ja dásseárvu áibbas lunddolaš oassi sin árgabeaivvis.
Dál gilvala bajásšaddanguovddáš 15 eará skuvllain oažžundihti Dronnet Sonja 2016 searvadahttin ja dásseárvvu skuvlabálkkašumi.
Rektor Christine Witt ii leat gullan sága ovdal Ávvir čuodjala sidjiide.
– Vuoi gáfat, lea máilmmi somá go mii leat árvaluvvon. Dien ođđasa in lean vel gullan, dál gal lean nu movttet, dadjá son.
Sáhttet vuoitit 250.000 ruvnnu
Norgga fylkkamánnit árvalit skuvllaid mat leat guhkit áigge badjel bargan ohppiid oahppobirrasiin.
Skuvllain galget maiddái deattuhit seavadahttima ja dásseárvvu vai oahppit dovdet oadjebasvuođa ja searvevuođa.
Dasa lassin galgá skuvllain buorre oktavuohta ruovttuin ja mánát ja skuvlabargit galget bures gulahallat.
Dronnet Sonja bálkkašumi juhket 16. gearddi. Bálkkašumi vuoitái geigejuvvo 250.000 ruvnnu, diploma ja dáidda. Vuoiti válljejuvvo čakčamánu loahpas.
Sáhkkiivuohta ovdagáttuid ovdalii
Áhkárvuona bajásšaddanguovddážis oaivvildit iežaset ánssášit bálkkašumi danin go deattuhit dásseárvvu ja searvadahttima beaivválaččat. Praktihkalaš bargguid bokte ohppet earret eará ođđa kultuvrraid birra.
– Go oahppit čájehit beroštumi ja sáhkkiivuođa, de eai badján sis ovdagáttut. Min oahppit leat fitnodateaiggádat, sii jođihit skuvllas idjadanbáikki. Sii láigohit turisttaide idjadansaji ja dán bokte oahpásmuvvet olbmuide geat bohtet miehtá máilmmi. Mii fitnat maiddái juohke jagi skuvlamátkkis gos oahpásmuvvat ođđa olbmuide ja kultuvrraide, čilge Witt.
Stuora bearaš
Áhkárvuona bajásšaddanguovddážis, Hámmárfeastta suohkanis leat 10 oahppi 1.-10. ceahkkái.
Bealli skuvlla ohppiin leat Somalias ja Kongos eret, rektor ges lea duiskalaš.
– Munnje lea hui dehálaš ovddidit dásseárvvu. Oahppit ohppet atnit árvvus ja dohkkehit nubbi nuppi. Min skuvllas lea buohkain seamma árvu, ja ohppiid gaska ii leat olggušteapmi ja vealaheapmi. Mii leat dego stuora bearaš, dadjá rektor Christine Witt.
Gilážii ávkin
Son muitala maiddái ahte skuvlla bargu lea ávkkálaš Áhkárvuona servodahkii.
– Nu go eará guovlluin maid, de leat dáppe maid olbmot vávjálasa ođđa olbmuide ja kultuvrraide. Mun jáhkkán skuvlla bargu lea mielde buoredeamen ja rievdadeamen dásseárvvu ja searvadahttima gilážis. Mun jáhkkán mánáid bokte lea álkit cuvket ovdagáttuid, čilge Witt.
Masá gonagaslačča
Go dronnet Sonja galledii Áhkárvuona mannan geasi fuomášii skuvlla rektor ahte galget ohcat Finnmárkku Fylkkamánnis nammaduvvot bálkkašumi vuoitin.
– Mii leat deaivan dronnet Sonja, ja dasa lassin leat beassan seavvit gonagasbearrašii miessemánu 17. beaivvi togas Oslos. Moatti jagi áigi ozaimet Oslo gielddas lobi vázzit skuvlatoga oaivegávpogis. Dalá sátnejođiheaddji Fabian Stang attii lobi, nu ahte mii leat áidna skuvla Oslo olggobealde mii lea beassan vázzit šloahta meattá Norgga našunálabeaivvi. Diet mátki lei maid oassin min dásseárvobarggus, ja leage báhccán min muitui, dadjá rektor.
Oahppit kánske lassánivčče
Dronnet Sonja bálkkašupmi movttiidahtášii sin joatkit ovddidit dásseárvvu ja searvadahttima, muhto rektor jáhkká das livččii vel eanet buoret bealit.
– Min skuvla dárbbašivčče eanet ohppiid, go máŋga oahppi gerget skuvllas boahtte jagi. Kánske soapmásat háliidivčče deike fárret go gullet min barggu birra. Mun jáhkkán boaittobeale báikkiin lea álkit lihkostuvvat integreremin. Olbmuin lea buoret oktavuohta ja dáppe veahkehallat nubbi nuppi. Dáppe lea maid ovdamearkkadihti bággu oahppat dárogiela jođánit go iežas gielain ii soaitte birgehallat dáppe. Buohkat leat rievtti mielde vuoitit jus olgoriikkalaččat fárrejit deike, loahpaha Áhkárvuona bajásšaddanguovddáža rektor Christine Witt.