-Almmuhus-
KULTUVRAIlludii sakka bálkkašumiin

Illudii sakka bálkkašumiin

-

-

Ikte geigejuvvui Finnmárkku fylka kulturbálkkašupmi neavttárii Nils Utsii. Giitosárdnis logai ahte ii leat guhkes áigái illudan nu olu go dál.

Finnmárkku fylkagieldda kulturbálkkašumi geigejit olbmuid gii lea guhkit áigge geavahan návccaid ja dáhtu bargat kultuvrra ovddidit.

Bálkkašupmi lea gudniskeaŋka sutnje gii lea ahtanuššan buot buoremusa kultureallimii.

– Dán jagi bálkkašumi vuoiti, Nils Utsi ollašuhttá buot eavttuid ja son duođaid ánssáša bálkkašumi. Son lea olu jagiid ovddidan Finnmárkku ja Davvi-Norgga kultuvrra neavttárin, bagadallin ja dramatihkkárin, logai Finnmárkku Fylkkasátnejođiheaddji Runar Sjåstad.

 

Vuosttaš sápmelaš

Deatnulaš Nils Utsi lei vuosttaš sápmelaš guhte studerii Teáhterallaskuvllas, son gazzagođii oahpu Oslos 1964:s.

Utsi bargagođii vuos «Den Nationale Scenes» Bergenis ovdal máhcai Davvi-Norgii 1971:s.

Dalle bargagođii Hålogalándda teáhteris, ja maŋŋel leat oaidnán su olu filmmain ja maiddái Beaivváš Sámi našunálateáhtera, Svenska Riksteatern ja The Ice Globe Theater lávddis.

 

Háliidii ruoktot

Giitosárdnis logai Nils Utsi ahte su gal sáhttá doalvut eret Finnmárkkus, muhto Finnmárku lea álo su fárus.

Son mearridii áigá ahte háliida bargat neavttáriin ruovttuguovllus.

– Go álgen neavttárin, de mearridin áigá ahte in áiggo guohput Oslo gávpogii. Mun háliidin Finnmárkui, ja nu dat šattai. Dáppe lean beassan oaidnit ahte olbmuid beroštupmi kultureallimii stuorru. Ledjen maid erenomáš rámis go gullen ahte oaččun dán bálkkašumi, in muite goas illudin ná sakka maŋimuš, dajai Utsi.

 

Finnmárkku ambassadevra

Finnmárkku fylkkagieldda kultuvrra ja johtolaga váldolávdegoddi juohká bálkkašumi.

– Lávdegoddi lea ovttaoaivilis ahte Nils Utsi lea nana ja árvvolaš bálkkašumi vuoiti. Nils Utsi sámi duogáš ja servodatáŋgiruššan leamaš máilmmi buorre ambassadevran Finnmárkui ja Finnmárkku kultuvrii, celkkii fylkkasátnejođiheaddji.

Nils Utsi oažžu 30.000 ruvnnu ja lásečiŋa bálkkašupmin.


Finnmárkku fylkkagielda jugii maiddái álbmotdearvvašvuođabálkkašumi, Johtolatsihkkarvuođabálkkašumi, ássanmiellabálkkašumi ja fágaoahpahallibálkkašumiid. Govas oaidnit fylkkasátnejođiheaddji Runar Sjåstad (gurut rávddas), Nils Utsi, Veiledningssenter for pårørende i Nord Norge, Arne Pettersen, Čáhcesullo sátnejođiheaddji Hans-Jacob Bønå, Andreas Aslaksen Sigvartsen ja Hanne Figenschou. Govven: Harald F. Hereide

 

-Almmuhus-