Sámediggepresideanta Aili Keskitalo oasálastá riikkaidgaskasaš filbmafestiválas The imagineNATIVE Film + Media Arts Festival Toronttos Canadas dán mánu, dát illudahttá Internašunála Sámi Filbmainstituhta.
Sámediggepresideanta Aili Keskitalo oasálastá riikkaidgaskasaš filbmafestiválas The imagineNATIVE Film + Media Arts Festival Toronttos Canadas dán mánu, dát illudahttá Internašunála Sámi Filbmainstituhta.
The imagineNATIVE Film + Media Arts Festival lea álgoálbmot media- ja dáiddafestivála, mii lágiduvvo juohke jagi Torontos Kanadas.
Prográmma lea viiddis, sihke filmmaid dáfus muhto maiddái eará kultuvrralaš dáhpáhusaid dáfus. Dán jagi lea erenoamáš dat go sámi filmmat bures čalmmustahttojit International Spotlight prográmma bokte.
Sámi filmmat čájehuvvojit festiválas namahusain: International spotlight on The Sapmi nation. Dieid beivviid lágiduvvo maiddái lávdedigaštallan sámi filmma birra.
– Lea erenoamáš somá oaidnit ahte sámi filbmabiras lea mielde hábmemin sisdoalu dákkár deaŧalaš filbmafestiválii álgoálbmotfilmmaid várás. Festivála lea áidnalunddot vejolašvuohta sápmelaččaide ovdanbuktit sámi filmmaid riikkaidgaskasaččat. Danne lea Sámedikki mielas deaŧalaš doarjut sámi filmma, mii leat earret eará oasseruhtadan “7 Sámi stories”filmmaid. Dás čađaha Sámi riikkaidgaskasaš filbmainstituhtta buori barggu mii bidjá vuođu sámi filbmaindustriijii mii lea stuorrumin. Jáhkán mii fargga beassat oaidnit sámi spillenfilmmaid maid nuorra sámi filbmadahkkit leat ráhkadan, dadjá sámedikkepresideanta Aili Keskitalo.
Buorre go beroštit
Internašunála Sámi Filbmainstituhta direktevra Anne Lajla Utsi lea ilus go sámediggepresideanta maid vuolgá festiválii.
– Lea hui illudahtti go Sámediggi čájeha beroštumi sámi filmmaid čalmmustahttit ja lea hui somá go presideanta searvá ieš, lohká son.
– Stuorra dáhpáhus
Utsi ieš oassálastá maid festiválas. Son lohká The imagineNative filbmafestivála leat stuorámus álgoálbmot filbmafestiválan.
– Dohko bohtet dieđusge olu geahččit, muhto maiddái eará filbmafestiválat ja distributevrrat, čilge Utsi.
Son lea movttet go sámi filmmaide lea várrejuvvon sierra oassi prográmmas.
– Dat lea buorre vejolašvuohta čalmmustahttit min filmmaid, ja lea stuorra dáhpáhus go bidje «Spotlight» midjiide, oaivvilda son.
Filbmainstituhta direktevra oaivvilda leat dehálažžan beassat čájehit sámi filmmaid dákkár stuorra festiválain:
– Go doppe leat eará festiválat, filbmaoastit ja nu ain, de dat biđge min filmmaid fas viidásat máilbmái ja eará festiválaide ja ostiide. Nu dat čájehuvvojit viidábut, lohká Anne Lajla Utsi.
Eanet imagineNative Film + Media Arts Festival birra sáhtát lohkat dáppe.
