Frank Martin Ingilæ illuda čavčča válgii, ja lohká iežas duđavažžan go lea nagodan dán áigodagas ollašuhttit lohpádusaid jienasteddjiide.
Frank Martin Ingilæ illuda čavčča válgii, ja lohká iežas duđavažžan go lea nagodan dán áigodagas ollašuhttit lohpádusaid jienasteddjiide.
Deanu dálá sátnejođiheaddji ja Bargiidbellodatevttohas Frank Martin Ingilæ illuda gieldaválgii, go dalle deaivvada eambbo olbmuiguin go dábálaččat.
– Illudan álohii válggaide, lea issoras somás áigodat. Olmmoš deaivvada ollu olbmuiguin ja olbmuin lea erenomáš stuorra beroštupmi politihkkii válggaáigodagas. Lea hui mávssolaš deaivvadit ja háleštit olbmuiguin, lohká son.
Stuorra ambišuvnnat
Frank Martin Ingilæ lea guokte áigodaga jođihan Deanu gieldda, ja lohká dálá áigodagas nagodan ollašuhttit máŋga ášši maid lei lohpidan jienasteddjiid.
– Mis leat stuorra ambišuvnnat ahtanuššat Deanu servodaga boahtte áigodagas. Vuođđoealáhusaid ovdánahttit ja hukset vuojadanhálla ođđa skuvlahuksema olis. Seammás háliidat nannet báikkálaš oahpahusa, vai nuorat eai dárbbaš fárret vai oahpu galget sáhttit váldit, lohká Ingilæ.
Válgagižžu
Bargiidbellodaga sátnejođiheaddjievttohas lohká iežaset dán áigodagas máŋga stuorra ášši čađahan ja álggahan, earret eará leat huksemin ođđa skuvlla ja fuolahusguovddáža Deanu šaldái.
– Fuolahusguovddáš lei mannan áigodaga válgagiččus, ja dan proseassa leat čađahan, muitala son.
Eambbo viessosajit
Deanus váilot ássanviesut, ja Frank Martin Ingilæ lohká iežaset háhkan ođđa viessosajiid.
– Leat maid ođđa industriijaguovllu ráhkadan. Deanus leat ollu fitnodagat ja ollugat háliidit álggahit fitnodaga, ja mii leat láhčán dili sidjiide. Erenomáš ollugat leat guolástemiin álgán, mii lea hui positiiva, lohká Ingilæ.
Ii duđavaš
Frank Martin Ingilæ ii loga fuomášit áššiid maid eai leat álggahan dahje čađahan.
– Jus leaš oktage ášši mainna in leat nu duđavaš, de lea dat giehtatelefovdna- ja govdafierpmádat. Eat leat nagodan stuoridit fierpmádaga doarvái, lohká son.
Ášši almmuhuvvui vuosttaš geardde 17.04.2015
