Sámediggepresideanta Silje Karine Muotka (NSR) sávvá lihkku Sigbjørn Gjelsvikii ođđa gieldda- ja guovlluministariin.
Ikte nammaduvvoi ovddeš gieldda- ja guovlluministtar Bjørn Arild Gram (Sp) ođđa suodjalusministarin maŋŋek go su bellodatustit Odd Roger Enoksen geassádii ministarin maŋŋel go bođii dihtosii ahte lea leamašan ovttas ovtta aiggi nieiddain gii dalle lei 18-jahkásaš. Enoksen lei dalle ieš Guovddášbellodaga jođiheaddji ja stuorradiggeáirras.
Sávvá lihkku
Bjørn Arild Gram sadjái lávkii ges Sigbjørn Gjelsvik. Ođđa gieldda- ja guovlluministtar lea dássážii leamaš Guovddášbellodaga finánsapolitihkalaš ságadoalli. Gjelsvik lea leamaš stuorradiggeáirras 2017 rájes ja ovddasta Akershus. Son čohkkái stuorradikki finánsalávdegottis dassái go nammaduvvui ministtarin.
Norgga stáhtaministtar Jonas Gahr Støre (BB) lei duhtavaš dáinna čoavddusin. Maiddái Sámediggi sávvá lihkku Gjelsvikii.
— Sámediggeráđi bealis de illudan bargagoahtit sámi áššiiguin ovttas Gjelsvikain. Seammás giittán Bjørn Arild Gram ovttasbarggus ja sávan sutnje lihkku suodjalusministariin.
