Håvard Klemetsen manná máilmmicupa maŋemus gilvvuide iluin. Son lea duhtavaš maid dán dálvvis lea olahan.
Håvard Klemetsena internašunála áigodat lea nohkame. Son lea dál aitto ollen Troandimii, gos galget máilmmicup gilvvut ihttin, ovdal go njulgejit Osloi loahpahangilvvuide Holmenkollenis lávvordaga. Loahppagilvvuide manná Klemetsen buriin mielain.
– Illudan Holmenkollenii gos mis galget guokte njuikema ja 15 km čuoigamat. Jáhkán šaddá fiinna loahpahanvuorru, dadjá son.
Olahusat ollu
Klemetsen lohká leamaš hui hušša dán dálvvi, muhto lea leamaš áigodat go lea olahan olu.
– Leat dieđusge olu maid lei sáhttit buorebut bargat, muhto lea dehálaš muitit buriid beliid maid, go muđui gal massá fokusa ja vearrut geavaha návccaid. 2 medáljja dahje golmma háve beassan vuoitoseremoniijai, njealji vejolašvuođas Falunas, gal ferte leat dohkálaš. Dieđusge sávat álo čuožžut bajimusas vuoitopállas, muhto ii sáhte vajálduhttit ahte eará gilvohallit leat maid hárjehallan buoremussan.
Nubbin buoremus norgalaš
Sus lea máilmmicupas leamaš dássedis valáštallanáigodat mas olahii nuppi saji minitouras Seefeldas, 3. ja 4 sajiid Sapporos, vuoitán Teamsprint Kuusamos ja vuoitán joavkogilvvuid Ramsauas earret eará. Dál lea son 7. sajis máilmmicupas ja nubbin buoremus norgalaš doppe.
– Leat vel guovttit gilvvut, ja áiggut bargat buoremusa doallat fokusa dassážii mii leat moalas. Šaddá gal buorre boahtit davás maid, čohkket návccaid fas ovddasguvlui, dadjá Håvard.
