Čakčat álggahuvvo sámi ja kvena giellaguovddáš Návvutnii Davvi-Romsii.
– Lea illusáhka ahte suohkanstivra mearridii álggahit giellaguovddáža, ja almmuhan virggi. Mii sávvat ohcciid geain lea sámegiella eatnigiellan. Návuona Sámiid Searvi lea guhka bargan oažžut giellaguovddáža suohkanii, ja giitit buohkaid geat leat veahkehan min, vai sáhttit áin čalmmustahttit sámivuođa Davvi-Romssa mearragáttis, lohká Návvuona Sámiid Searvvi jođiheaddji Gunn-Anita Jacobsen preassadieđáhusas.
Son lea maid goalmmádin NSR Davvi-Guovllu sámedikkelisttus.
Návuona kvena ja mearrasámi searvvi jođiheaddji maid illuda.
– Lean ilus go suohkanstivra ovttajienalaččat dohkkehii giellaguovddáža mearrádusaid ja organiserenplána, lohká Anne Gerd Jonassen.
Guhka bargan
– Návuona Sámiid Searvi, Návvuona kvena ja mearrasámi searvi ja Návvuona suohkan leat moadde jagi bargan giellaguovddáš plánaiguin. Álggu rájes leat gulahallán Sámedikkiin. Juste ovdalaš go Aili Keskitalo lonuhuvvui eret presideantan oaččuimet 220 000 ruvnno Sámedikkis. Dat doarjja lasiha maiddái boahttevaš doarjagiid go mii dohkkehit ceahkkálastinplána, lohká Návvuona giellaguovddáža bargojoavkku jođiheaddji Ragnhild Enoksen.
Álggahuvvo čakčat
Čakčat álggahuvvo sámi ja kvena giellaguovddáš Návvutnii. Suohkanstivra dohkkehii mearrádusaid, golmma jagi doaibmaplána ja ruhtadeami.
Sii leat dál almmuhan virggi giellaráđđeaddin golmma jahkái, gii galgá giellakurssaid lágidit, giellakaféa ja eará lágidemiid gos sámegiella gullo.
Jus prošeaktaáigodat lihkostuvvá de oažžu giellaguovddáš jagi 2020 rájes miljovnna Sámedikkis jahkásaččat.
Suohkan galgá maid ohcat Romssa fylkkagielddas regiovnnalaš ovdánahttindoarjaga, vai sámi oassi guovddážis ovddiduvvo, ja vai besset áŋgiruššat soapmása gii ráhkadan doaibmaplána kvenagillii.
