Kathrine Nedrejord lea girjemátkkis Finnmárkkus. Son lohká illudit ságastallat iežas diimmá romána birra, «Forvandlinga», mas govvida eallima maŋŋel veagalváldima.
Beakkán Finnmárkku girječálli ja Havmannprisvinner 2019, Kathrine Nedrejord, álggahii iežas girjjejahkemátkki Álttá girjerádjosis vuossárgga. Maŋŋebárgga lei son Sámi joatkkaskuvllas Kárášjogas. Mátkki lea Finnmárkku fylkkagirjerádjosa «Girjejahki 2019»olis. Kathrine Nedrejord lea girječálli ja dramatihkar.
Son lea sápmelaš , muhto lea bajásšaddan Gilevuonas ja dál ássá Parisas. Son áigu ságastallat iežas maŋemuš almmuhemiid birra, muhto erenomážit deattuha «Forvandlinga», mainna vuittii Havmannprisen 2019 nammasaš bálkkašumi, čállá Finnmárkku fylkkagielda preassadieđáhusastis.
– Mun illudan mátkkoštit ja hállat olbmuiguin iežan girjjiid birra. Girječálli lea hui oktonas, nu ahte deaivvadit lohkkiiguin lea hui buorre, dadjá Kathrine Nedrejord.
Ságasta erenoamážit «Forvandlinga» birra
Maŋŋel go girječálli Kathrine Nedrejord veagalváldojuvvui, de čálii romána mas muitala man láhkai nagodii máhccat bákčasis ja doaibmagoahtit fas árgabeaivvis. Son váiddii ášši ja válljii rahpasit muitalit traumáhtalaš dáhpáhusa birra. Diibmá ilmmai su romána «Forvandlinga» mas govahallá eallima minuhtaid, diimmuid ja beivviid maŋŋel veagalváldima. Son lea čállán guokte nuoraidgirjji «Slepp meg» ja «Det Sara skjuler», ja dan guokte girjji birra áigu maid ságastallat.
Veagalválddálašvuohta
– «Det Sara skjuler» dáhpáhuvvá Kárášjogas ja leage maid veagalválddálašvuođa birra, muhto oapmahaččaid perspektiivvas. Veagalválddálašvuohta lea dehálaš fáddá masa mun áŋgiruššan hirbmadit, go lea dehálaš bidjat sániid ja duostat hállat dan birra. Mii diehtit ahte dat maid dáhpáhuvvá sámi servodagas, ja go mátkkoštan de geavahan liibba ságastit fáttá birra, dadjá Kathrine Nedrejord. Son muitala ahte «Det Sara skjuler» váldoolmmoš lea Laila, guhte lea Sara buoremus ustit. Laila háliida gávnnahit gii lea veagalváldán Sara, muhto Sara ii muital.
— Illudan sakka ságastit iežan girjjiid birra, lohká Nedrejord.
Galleda 11 girjerádjosa
Kathrine Nedrejord lea deaivamis 11 girjerádjosis Finnmárkkus, Deanus, Čáhcesullos, Gáŋgaviikkas, Muosáin, Hámmárfeasttas ja Láhpis. Moadde vahkku geahčen máhccá fas Finnmárkui ja dalle fas galleda Davvesiidda, Ákŋoluovtta ja Guovdageainnu.
Girjejahki 2019 loahpa guvlui
Kathrine Nedrejord lea mielde ovtta dain maŋemuš mátkkiin Finnmárkkus «Girjejahki 2019» oktavuođas, maid Finnmárkku fylkkagieldda lágida. Moatti vahkku geahčen loahpahuvvo «Girjejahki 2019» girječálliin Ingeborg Arvolain ja luonddu- ja birasgirječálliin Sigri Sandbergain.
