Finnmárkku boazolohku orru bissume diimmá dásis, čájehit Fylkkamánni gaskaboddosaš logut.
Finnmárkku boazolohku orru bissume diimmá dásis, čájehit Fylkkamánni gaskaboddosaš logut.
– Hui illudahtti, dadjá Eanandoallodirektoráhta direktevra Jørn Rolfsen preassadieđáhusas dasa go Finnmárkkus orru boazolohku bissume seamma dásis go diibmá.
Gaskaboddosaš loguid leat sii rehkenastán boazodolliid iežaset boazodoallodieđáhusaid vuođul, maid siidaoasit leat addán Fylkkamánnii giđđat. Dat logut čájehit dušše vehá lassáneami Oarje- ja Nuorta-Finnmárkkus.
Muhtin orohagat rahčet ain alla boazologuin, ja leat sullii seamma orohagat main jagi áigi juo ledje bohccot badjel mearriduvvon logu.
Nuortan ain vuollelis
Nuorta-Finnmárkkus lei njukčamánu 31.b 2016 gaskaboddosaš lohku 66 700 bohcco, mii lea 1400 eambbo go jagi áigi. Muhto lea ain ollu vuollelis go bajimus mearri, mii lea 70 650.
– Ovdal ledje golbma orohaga /siidda gos lei ain beare alla boazolohku. Dál leat dušše guokte, muhto ovtta siiddas/orohagas leat olu badjel meari. Dás orrot muhtimat “posišuneren” ođđa vuolidanmearrádusaid dihte, čállá Finnmárkku fylkkamánni neahttasiidduset.
Oarjin ain badjelmeari
Oarje-Finnmárkkus lea gaskaboddosaš lohku ges 79 150, mii lea 200 eambbo go jagi áigi lei. Dasto leat doppe 1000 bohcco badjel mearriduvvon bajimus boazologu.
– Ovdal ledje 11, dál leat gávcci orohaga/siidda gos lea beare alla boazolohku. Eanas orohagain gos lei boazolohku badjel mearriduvvon logu, leat nagodan unnidit ealuideaset dán jahkái. Muhto guovtti orohagas lea baicca lassánan boazu, ja dan nuppi orohagas dáfus lea dát ovdáneapmi vuorjašuhtti, čállá Fylkkamánni iežaset neahttasiiddus.
Fylkkamánni čuovvola
Čakčageasi leat sis gárvásat boazologut juohke siidoasi ja orohaga nammii, ja Eanandoallodirektoráhtta lea duhtavaš oppalaš bohtosiiguin.
– Lea hui illudahtti go nu ollu boazodoallit guorrasit dan vuohkái movt hálddašit ealáhusa resurssaid. Finnmárkku fylkkamánni čuovvola čavčča beallái sin geat leat dieđihan boazologu mii lea badjel mearriduvvon boazologu.
Nu dadjá Eanandoallodirektoráhta direktevra Jørn Rolfsen preassadieđáhusas.
