Ikte bávkaledje Áilegastunealla čađa, mii lea Álttá oarjjabealde. Prošeaktajođiheaddji lea duhtavaš bargguin, ii ge loga leamaš váttes hástalusaid. – Lea leamaš hui earenoamáš ja somá jođihit dán stuora prošeavtta, dadjá Torgeir Dahle. Geahča video!
Ikte lei illubeaivi sihke prošeaktajođiheaddjái ja tuneallabargiide go dalle viimmat bávkaledje Áilegastunealla čađa.
LNS rusttetbargit miehtá Davvi-Norgga leat bargan dáinna prošeavttain.
Áilegastunealla lea dat maŋemus tunealla dan čieža tuneallas Oarje-Álttá prošeavttas. Dál ii leat guhká dassážii go dát šaddá oassin ođđa E6-luottas.
Cuoŋománu 20. beaivvi bávkalahtte maŋimuš geardde 3.4 kilomehter guhkosaš Áilegastuneallas, dan oainnát bajimusas videos man Trond Jøran Nilsen lea filbmen.
Tunealla rahppo johtolaga várás 2018 čavčča.
Earenoamáš vásáhus
Kåre Furstrand lea bargan Stáhta geaidnodoaimmahagas olu jagiid, ja lea dál pensionista. Dat aŋkke ii hehtten su searvamis dán stuora dáhpáhussii.
Son lea leamaš mielde njunnošis jođiheame olles dán Oarje-Álttá E6 prošeavtta.
– Lean leamaš mielde dán prošeavttas álggu rájes, nu ahte lei hui lunddolaš munnje leat mielde dás. Go bessen bávkalit čađa Áilegasvári lei hui earenoamáš vásáhus. Lea vuosttaš geardi go dán dagan, ja lei hui somá, dadjá son.
Bassivárri
Ovdal go álge bargat tuneallain mii manná Áilegasvári čađa, de váruhuvvui ahte dá lea bassivárri, eai ge soaitte oažžut ráfi.
Prošeaktajođiheaddji mieđiha ahte sus lei dát jurdagiin barggadettiin, ja diđii ahte sáhttet boahtit váttis hástalusat.
– Bohte oallugat lohkat ahte dán vári galgá diktit orrut, muhto mii válddiimet riskka, ja álggiimet bargat dainna. Dál leat fargga geargame, ja measta buot lea mannan bures. Leat dieđusge leamaš smávva váttisvuođat gaskkohagaid, muhto eai dakkár stuora váttisvuođat ja lihkohisvuođat maid suoli ledjen vuordán. Lean hui ilus go lea mannan ná bures, eai ge leat leamaš duođalaš lihkohisvuođat, dadjá son.
