-Almmuhus-
-Almmuhus-
MAGASIIDNA – I´ll be there soon

– I´ll be there soon

-

-

Bišku nieiddažat vuostáiváldet su miehtá máilmmi, vuordimis dahket nu maiddái Guovdageainnus boahtte vahkos. – Dat lea dušše bonus, dadjá ieš.

Dát 14-jahkásaš gánda guhte lea Grankullas Suomas eret, beakkehii albma duođas Davvi-Riikkain maŋŋil go almmuhii iežas vuosttaš lávlaga «New Way Home» 2013:s. Dál johtá miehtá máilmmi ja čuojaha. Sotnabeaivvi go Ávvir hálešta Isac Elliotain de lea son justa Istanbulas Durkkas, ja son eallá eanaš nuoraid niehkoeallima.

 – Dát lea hirbmat vásáhus. Lea somá go lea beroštupmi maiddái Istanbulas, in dieđe gal manne lea beroštupmi mu musihkkii muhto nu lea goit ja dat lea máilmme somá. Mun lean nu ilus dáinna ja go beasan musihkain ná bargat. Dát han lea dego niehku ja mun barggan nu bures go nagodan, dadjá násti ieš.

 

Kaos ja bišku nieiddat

Moadde vahkku áigi čuojahii Elliot Tromssas P4 ja Borasdávdasearvvi «Vinterlyd» doaluid oktavuođas. Dalle ledje olu nieiddažat čoahkkanan olggobeallái dan hotealla gos son orui. Loahpas šattai almmái twitter-dieđu bokte gohččut fánssaid mannat ruoktot: «Thank U so much to everyone outside the hotel & 4 the hugs.You were so many. But PLEASE go home.There is a storm.See U at the show tomorrow»

 — Šattai veaháš kaos, ledje olu fánssat. «Vinterlyd» oktavuođas čuojahin guokte konseartta, ovtta Troanddimis ja nuppi Tromssas. Ja mii dagaimet ođđa olahusaid dáid oktavuođas. Ledje buori showat ja šaddá seamma buorre dál go boađán Guovdageidnui, dadjá Isac Elliot ovdal go doapmala jearralit mo diet báikenamma dadjo.

 

 – Muhto mo lea go nieiddat biškot?

Isac čaimmiha veaháš ja smiehtasta ovdal go vástida.

 – Dat gal lea oalle buorre bonus, in mun gal lávllo vai šattašin dovddusin ja nu ain, muhto dat lea oalle erenoamáš ja somá.

 

Illuda boahtit Sápmái

Nuorra nieiddaid oiddot lohká illudit boahtit Guovdageidnui. Son lea govaid geahčadan ja oaidnán makkár doppe lea.

 – Mun in leat goassege ovdal leamaš seammasullasaš báikkis go Guovdageainnus. Govaid mielde orro fiinnis leamen ja mun duođaid vuorddán beassat boahtit, muitala ieš.

Guovdageainnus son čuojaha «Sámás Muinna» giellakampánja loahpaheami oktavuođas mii lágiduvvo ovttasbarggus Sámi Musihkkafestiválain, muhto ieš ii loga gal diehtit nu olu sápmelaččaid ja sámegiela birra.

 – Mun dieđán ahte sápmelaččain lea sierra giella, dahje eará giella go suoma- dahje ruoŧagiella. Mun lean moai oaidná govaid gávttiin, dat leat duođaid čábbát. Muđuid in dieđe gal áktánasat, in ge leat goassege deaivvadan sápmelaččain ovdal, čilge son.

 

Áigu oahpahallat sámegiela

Vaikke Isac Elliot ii loga ge áktánasat diehtit sápmelaččaid birra, de lohká liikká áigut oahpahallat veahá sámegiela. Ávviris leage juste dál gilvu instagrambokte, gos olbmot galget sáddet cealkagiid maid háliidit oahpahit Isac Elliotii.

 – Áinnas, jáhkán oahppat álkes sániid. In olles giela gal olle oahppat, muhto veahá gal várra oahpan go lean Guovdageainnus. Muhto in jáhke dárbbašit nu olu oahpahallat. Jáhkán sii áddejit maid logan, jus eai ádde de ferten eaŋgalasgillii hállat ja jus dat ge ii meinnestuva de ferten várra sámástit, čaibmá son.

 

Mánnán lávlugođii

Vaikke ieš ii leat go 14-jahkásaš de lea liikká jo oalle guhkká bargan musihkain. Son álggii guđajahkásažžan koaras lávlut ja 11-jahkásaš go vuolláičálii skearrošiehtadusa. Muđuid lávii maid searvat musikálaide ja filbmet iežas go lávlu ja juohkit daid YouTube bokte.

 – Dan rájes lea vaikke mii geavvan, čaibmá ieš ja duođašta alddis leamaš niehkun beassat bargat musihkain.

 – In leat dál ge gal nu hirbmat boaris, muhto lean niegadan dán dalle jo go ledjen oalle unni. Buot lea dáhpáhuvvan nu jođánit, muhto mun lean hui ilus dainna in ge lean goassege jáhkkit ahte ná bures galggai mannat, čilge ieš.

 

Liiko valáštallat

Jearahallamis namuha Isac dávjá iežas váhnemiid. Son ii loga gal váhnemiid goassege bággen su álgit musihkkárin. Su áhčči Fredrik Lundén dahje Fredi, ieš čuojaha musihkkajoavkkus.

 – Muhto ii min bearaš gal leat nu beare musihkalaš. Mun álgen musihkain go das mun beroštan.

Muhto lávlu berošta maid eará áššiin, erenoamážit lohká liikot valáštallat.

 – Mun liikon speallat jiekŋahockey. Mun hárjehallen jiekŋahockey vihtta jagi ovdal go álgen musihkain bargat. Ja de liikon spáppa čiekčat ja olbmáiguin leat fárrolaga.

 

Isac Elliot árgabeivviid birra:

– Go lean ruovttus de lihkan iđđes, manan skuvlii, boađán skuvllas, lean fárrolaga ustibiiguin ja de nohkan.

Muhto go musihkain barggan de ii leat oktage beaivi seammalágan, daid beivviid dáhpáhuvvá olu eanet.

Nuorravuođaeallin

Ja son lohká iežas dávjá astat dábálaš nuorravuođaeallima eallit. 

 – Jua dieđusge, mun lean olbmáiguin álot go fal lean ruovttus. Lean dávjá mátkkošteamen, muhto go lean ruovttus de ii láve nu olu prográmmas ja de gal lean singuin fárrolaga.

Maiddái skuvlabargguid lohká šaddat bargat.

 – Diehttelasat barggan bihtáid. Mus manná bures skuvllas, dasa lassin lea mu áhčči oahpaheaddji ja das lea olu ávki.

 

Moarseozus

Juovlamánus go Isac Elliot lei Oslos de logai ovtta jearahallamis NRJ radiokanálii ahte lea moarseozus.

 – Dađi bahábut in leat gávdnan moarsi vuos, lean ain ozus, čaibmá son.

 

 – Asttat ban áktánasat ohcat?

 – Jua dieđusge, olusat jáhkket ahte mus lea álot hušša, muhto mus lea oalle olu astoáigi maid. Diehttelasat barggan garrasit ja hirbmat olu, muhto mus lea dilli leat fárrolaga olbmáiguin ja maiddái deaivat ođđa olbmuid, dadjá son ovdal go jietna rievddiha.

Árvideames lea oalle čáppa modji go joatká:

 – Dál mus lea dilli gávdnat moarsi, dadjá son ja skužista.


GÁVDNÁ GO: Isac Elliot lea moarseozus, de leaš oaidnit gávdná go Sámis dan gean ohcá.
Preassagovva: Sony Music

Johtá miehtá máilmmi

Dál lea Isac Elliot mannamin Los Angelesii, Amerihkkái. Doppe son lea oalle dávjá.

 – Dál galggan vuolláičállit muhtin šiehtadusaid, jaaaaa eeeeehm-mm-mm-mm..

Almmái orro smiehtadeamen lea go sus lohpi muitalit dáid, jade joatká:

 – Mii galgat báddet muhtin lávlagiid. Bearaš vuolgá mielde, eatni guovttos áhčiin dárbbašuvvoba mielde go šiehtadusat galget vuolláičállot, čilge son.

Go ná nuorran johtá miehtá máilmmi ja bargá musihkain de dárbbašit ollesolbmot mielde.

 – Muhto mun beasan olu mearridit ieš, álot jerron ovdal go mearriduvvo mihkkege ja dat lea buorre. Olu jerro maid áhčis, ja son han jurddaša mii munnje lea buoremussan.

 

Ii basa lihtiid

Isac Elliot deattuha máŋgii ahte son eallá dábálaš nuorravuođaeallima, muhto okta diŋga goit earuha su olu eará 14-jahkásaččain. Son oainnat ieš dine ruđaid ja máksá iežas rehkegiid. Ii ge son oaččo «vahkkoruđaid» iežas váhnemiin.

 – Muhto in mun dan gal oba siđa ge. In mun hálit eatni guovttos áhčiin goldit ruđa, dadjá son ja lohká leat somán ieš birget ruđalaččat.

 – Dieđusge, go oainnán mo eará nuorat dahket de gal háliidan ieš geahččalit dinet ovdalii go veallát ruovttus soffá alde ja buoskut ja de oažžut váhnemiin ruđa. Diehttelasat lea dát somá ovtta gaskka, ieš lean maid ovdal ožžon «vahkkoruđaid», muhto dál lea buoret dovdu go ieš dinen. De beasan buori oamedovdduin oastit maid diŋggaid.

Go ii oaččo vahkkoruđaid de ii daga ge dakkár bargguid mo olu earát dahket, son ii doalvvo ruskkaseahkaid ruskalihttái, iige basa lihtiid.

 – Eeeeh.. Na mun han in oačču vahkkoruđaid. In mun de dárbbaš diekkáriid dahkat, čaibmá son ovdal go lasihastá:

 – Muhto mus leat olbmát geat maid eai bargga maidege ja liikká ožžot ruđaid. Oalle olu vel, dat orro mu mielas boastut. Dakkárat gal veahá suhttadit mu.

 

 – Dál gal sáhttet du olbmát maid suhttat dutnje go nie logat?

 – Dieđusge, muhto muhto, čaibmá son.

 

Ovdal go loahpahetne jearahallama de son háliida cealkit dearvuođaid Sápmái:

– Háliidan dušše dadjat ahte fertebehtet bohtit geahččat dan showa, dat šaddá perfeakta ja nuu buorre. Ja de vuorddán beassat boahtit diehko ja vuorddán beassat deaivvadit fánssaiguin. I´ll be there soon!

 

 

 

 

 

 

 

 

 

 

 

 

 

-Almmuhus-